Mendikotako 1921eko maskarada

Euskal Herriko inauteri garrantzitsuenetako bat Zuberoako maskarada da, normalean urtarriletik martxora bitartean ospatzen dena. Urtero, Zuberoako herri bateko gazteak arduratzen dira antzezpenak antolatzeaz, eta igandero inguruko herrietan zehar ibiltzen dira. Maskarada bi zatitan egituratzen da: goizean egiten den barrikada eta arratsaldean egiten den ofizioa. Parte-hartzaileak sinbolikoki kontrajarritako bi taldetan banatzen dira: gorriak eta beltzak. Lehenengoek ordena, diziplina eta dantza irudikatzen dituzte; bigarrenek kaosa, iseka eta kritika soziala. Bi taldeen arteko borroka sinbolikoa gorriek beltzen aurka lortutako garaipenarekin amaitzen da beti, horrela ordenaren berrezarpena antzeztuz. Goian ageri den argazkia 1921ean Mendikotan egindako maskaradan ateratakoa da.