Artolak eta Rezustak bakarrik jarraituko dute Masterseko lehen postuan
Bengoetxea VI.a eta Martija 16-22 menderatu dituzte Sorian. Liderrak 1-12 aurreratu dira markagailuan, baina gero lan asko egin behar izan dute 80 minutu luzatu den dema ixteko.
Iñaki Artolak eta Beñat Rezustak Caixabank Masterseko bederatzigarren garaipena eskuratu dute gaur arratsean Sorian jokatutako neurketan. Oinatz Bengoetxea eta Julen Martija 16-22 menderatu dituzte gora-behera dezenterekin.
Izan ere, sailkapeneko liderrak 1-12 aurreratu dira markagailuan. Soriako pilotalekuaren lur bizia aprobetxatuz, min handia egin dute bi jotzaileek eta bazirudien neurketa azkar amaituko zela.
Bengoetxea eta Martija pilotari borrokalariak dira, ordea, eta apurka-apurka aldeak murrizten joan dira, eta partidan bete-betean sartzen. 8-12 hurbildu dira lehenik, 7 tanto jarraian eginez, eta ondoren 16-18 ere ipini dira.
Artolak eta Rezustak ez dute garaipena ihes egiten utzi, baina azkenean 78 minutu eta 670 pilotakada behar izan dituzte neurketa ixteko.