Britainia Handira pateran iristen direnei asiloa ukatzeko legea aurkeztuko du Sunakek

Rishi Sunak britainiar lehen ministroak lege berria aurkeztuko du, ziurrenik datorren astean, Mantxako Kanalaren bidez Britainia Hndira pateran edo beste ontzi txiki batzuetan sartzen diren migratzaileen asilo-eskaerak ukatu daitezen.

Britainia Handira Mantxako Kanaletik ontzi txikietan iristen diren migranteei asiloa ukatzeko legea aurkeztuko du Gobernuak datorren astean, Chris Heaton-Harris Irlanda Iparralderako Estatu idazkariak igande honetan jakinarazi duenez.

Legeria berriarekin, Barne ministro britainiarrak, Suella Bravermanek, Ruanda «edo hirugarren munduko herrialde seguru» batera erbesteratu ahal izango du Britainia Handira pateran edo bestelako ontzi txiki batean iristen den edozein pertsona.

«Herrira legez kanpo etortzen bazara, ezin duzu asilorik eskatu», berretsi du Heaton-Harrisek.

Lehen ministroak lehentasuntzat du Mantxako Kanalaren bitartez migranteak Estatura iristeko aukera oro ukatzea.

Sunakek bere herrialdean nahi ez dituen pertsona horietan gehienak Estatu frantsesetik abiatzen dira Britania Handira. Hori dela-eta, espero da datorren ostiralean Emmanuel Macron presidente frantsesarekin hitzartuta duen bileran gai hau jorratuko duela.

Lege berria justifikatzeko eskuin muturrak berezko dituen argudioak ditu oinarri lehen ministro britainiarrak. «Legez kanpoko immigrazioa ez da bidezkoa britainiar zergadunentzat, ez da bidezkoa hona legez etortzen direnentzat», adierazi dio Rishi Sunakek ‘Sunday Express’ egunkariari.