Gasteizko TAO berriak sei kale gehiago hartuko ditu San Martinen, bizilagunek eskatuta
Irailaren 15ean Gasteizen indarrean jarriko den TAO berria San Martin auzoko sei kaletara zabalduko da, Udalak auzo horretako Bizilagunen Elkarteak egindako alegazioa onartu ondoren. TAO berri honek Arana, Aranbizkarra, Santa Luzia, San Martin, Aranzabal eta Adurtza auzoak hartuko ditu.
Gasteizek TAO gune berriak jarriko ditu abian, auzo- eta merkatariza-elkarteen alegazioak entzun ondoren. TAO arautzen duen ordenantza berrira aurkeztu dira, eta astelehenean onartu dira Tokiko Gobernu Batzarrean. Asteazken honetan igaroko dira dagokion batzordetik, eta ostegunean onartuko da behin betiko Udalbatzan. Ordenantza irailaren 15ean sartuko da indarrean.
Alegazio-prozesuaren ondoren egindako aldeketa nagusietako bat San Martin auzoan izango da. Zehazki, TAO gunea sei kale gehiagotara zabaltzea erabaki da. Ama Teresa Kalkutakoa, Miren Martinez Saez del Burgo, Mediterraneo etorbideko 2., 4. eta 6. atariak, Maria Josefa del Corazon de Jesus eta Berriotxoako San Valentin gehitu dituzte.
Gasteizen TAO antolatzen duen ordenantzaren arauketa berria, plazak 6.000tik 11.000ra handituko dituena, hasiera batean maiatzaren amaieran onartu zen Udal Gobernuko taldeek (PSE eta EAJ) Elkarrekin alderdiarekin lortutako akordioari esker.
Ondoren, alegazioak aurkezteko epea zabaldu zen eta norbanakoek, enpresek, San Martingo auzo elkarteak, Gasteiz On merkatarien elkarteak eta SEA-Empresarios Alaveses patronalak aurkeztu zituzten. Guztira hamahiru alegazio onartu eta hamaika ezetsi dira, batzuk jatorrizko testuan jasota daudelako, Udalak ohar baten bidez jakinarazi duenez.
Merkatarientzako TAO berezia
Gainera, Gasteiz Onek estatuta, ibilgailu mistoei, furgoiei edo 3.000 kilorainoko zama erabilgarria duten kamioiei TAO bereizgarria emateko aukera sartu da, betiere merkataritzako jarduera bati lotuta badaude.
Era berean, partzialki onartu da SEAren alegazioa, hasierako testuan aurreikusita ez zeuden txikizkako merkataritzako eta kontsumo-ondasunen konponketarako zenbait jardueratan merkataritzako TAO bereizgarria sartzeari buruzkoa.