Nazioarteko emakumerik ospetsuenak 71 urte bete ditu

Estatu Batuetako telebistako programarik ikusiena gidatu zuen 25 urtez, eta horri amaiera eman zionean aktore lanari ekin zion berriro. Oprah Winfrey munduko emakumerik ospetsunena izendatu zuen 'Forbes' aldizkariak 2010ean, eta oraindik ere eragina izaten jarraitzen du.

Eskuin muturreko diskurtsoek hauteskundeak irabazi dituzten herrialde batean, eragin handieneko pertsonetako bat emakumea eta beltza da. Oprah Winfreyk telebistatik aldatu zuen Estatu Batuen historia. Gaur 71 urte betetzen ditu, eta nahiz eta orain dela hamarkada batzuk bezain aktibo ez egon, bere herrialdean ez ezik, mundu osoan ere pertsonaia ezaguna izaten jarraitzen du.

"The Oprah Winfrey Show" Estatu Batuetako historiako saiorik ikusienetakoa izan zen. Bere hastapenak apalak izan baziren ere, urte batzuk geroago aktore eta abeslariak ilaran jarri ziren elkarrizketatuak izateko. 25 urte eman zituen antenan, eta denbora horretan esklusiba ugari lortu zituen, elkarrizketatuak berarekin eroso sentitzen baitziren eta inoiz kontatu ez zituzten gauzak kontatzen amaitzen baitzuten. Oprahk berak kontatu zuen behin bortxatua izan zela txikitan, eta horrek atea ireki zuen kontatzeko zerbait zeukatenei beren istorioak kontatzeko.

1993an, Michael Jacksoni elkarrizketa egin zionekoa izan zen bere telebista ibilbideko ikus-entzule gehien izan zituen unea. 62 milioi ikuslek Neverland, abeslariaren etxea, ezagutu zuten. Elkarrizketa horretan azaldu zuenez, pigmentu arazo bat zuen larruazalean, zuritzeko prozedura estetikoren bat egin zuelari uko eginez. Hura izan zen Jacksonek elkarrizketa batean lasai hitz egiten zuen lehen aldia, eta horrek ospe handia eman zion kazetariari. Beste mugarri bat izan zen Ellen Degeneresek publikoki lesbiana zela esan zuenean. 1997a zen, eta homosexualitatea ez zegoen orain bezain ondo ikusita.

Bere lorpen handienetako bat Hegoafrikan akademia bat irekitzea izan zen. 2002an Nelson Mandelarekin bildu ondoren, diru-sarrera txikiko familia baina ikasketetarako gaitasun handiko neskak ezagutu zituen. 2007an, Winfreyren Lidergo Akademia zabaldu zuen. 40 milioi dolarreko kostua izan zuen, filantropia proiektuetara bideratutako bere fundazioaren bidez bildutakoa.

Sarien aroa

Bere showa amaitu baino urtebete lehenago, 2010ean, 'Forbes' aldizkariak munduko ospetsuena izendatu zuen. Gainera, 'Life'k bere belaunaldiko emakumerik eraginkorrena dela esan zuen, eta 'Time'k XX. mendeari eta XXI. mendearen hasierari forma eman dioten lau pertsonetako bat izendatu zuen.

Duela ia 14 urte amaitu zuen bere programa, baina aktibo mantendu da. Urte horretan bertan, Jean Hersholt Oscar Humanitarioa jaso zuen, kausa sozialen alde egindako lanagatik. Era berean, aurkezle izateko baztertu zuen emakumezko aktore ibilbideari ekin zion berriro.

2018ko Urrezko Globoen zeremonian sexu-jazarpenaren aurkako hitzaldi bat eman zuen, oso txalotua izan zena eta MeToo mugimenduari laguntzeko balio izan zuena. Urte horretan Cecil B. DeMille Saria ere eman zioten, Urrezko Globoek ibilbide osoari ematen diotena.

2021ean, Meghan Markle eta Harry Windsor elkarrizketatzea lortu zuen, Britainiar Errege Etxea utzi ondoren, eta 2024an telebistara itzuli zen programa polemiko bat aurkeztuz, bere pisuarekin eta argaltzeko erabiltzen diren botika berriekin duen harremanaz hitz egin baitzuen.