Urteetan metatutako haserrea agertu zuten atzo Osakidetzako langileen ordezkariek, iragarritako mobilizazioen hasierarekin batera. Satse, ELA, LAB, CCOO eta UGT sindikatuek osasungintza publikoan lan egiten duten guztientzako benetako konponbidea eskatu zuten, eta iragarri zuten atzo Arabako, Bizkaiko eta Gipuzkoako ospitale eta osasun etxeen aurrean egin zituzten elkarretaratzeak udazken bero baten hasiera baino ez zirela izan. Langile guztiak deitu zituzten grebara urriaren 30erako, eta abenduaren 9rako, 10erako, 11rako –Araban, Bizkaian eta Gipuzkoan, hurrenez hurren– eta 14rako. Bestelako mobilizazio gehiago ere iragarri zituzten. 

Hainbeste gatazka, hainbeste greba tarteko, zenbaiti ez zaio harrigarria irudituko Osakidetzaren funtzionamendu hala moduzkoa, eta ez da falta hori pentsatzea nahi duenik ere. Sekuentzia alderantziz planteatuta dago, ordea. Osakidetzak duen arazoa ez dira langileen grebak, eta, jakina, arazoa ez da atzo goizekoa. Lan ituna negoziatu nahi dute Osakidetzako langileek, hemezortzi urtean eguneratu gabe dagoena. Arazoa, beraz, kronikoa da, Osakidetzaren gainbehera bezala, eta horren kausa ez dira langileak edo haien grebak; aitzitik, mobilizazioak osasun sistemaren egiturazko arazoaren ondorio dira. «Lan baldintza onak, osasungintza ona», aldarrikatu zuten atzo, eta haien lan baldintzek zerbitzuaren kalitatean duen eragina nabarmena da. Langile batzuen eskubideen aldeko borroka da eta elkartasuna merezi du, baina ez da lan baldintzen kontua bakarrik. Osasun sistema publiko hobea eskatzen dute eta, horrenbestez, arrazoi bikoitza dute euskal jendartea beraien mobilizazioekin bat egitera gonbidatzeko. 

«Benetako konponbidea» nahi dute, eta Administrazioak badaki hori ez dela adabakiekin konpontzen. Joan den uztailean SME Euskadiko Sendagileen Sindikatuarekin sinatutako akordioa ez da konponbide integral baterako adibide ona, hain zuzen. Sailburua prest agertu zen orduan «sendagileekiko gatazka eragiten duten alderdi batzuk arintzeko», baina zinez konponbide bat bilatzeko borondatea erakutsi nahi badu, lanbide guztietako langileekin negoziatu beharko du.