Luzaroan pentsatu izan dut, Oslon, Norvegiako hiriburuan, Bake Nobel Sariak emanen zizkietela pertsona eredugarriei, hau da, gizaki bakezale, baketsu eta bakegileei, alegia, ezaugarri horiengatik nabarmendu diren gizasemeei edota gizalabei, esate baterako, Mahatma Gandhiren tankerako pertsonei, adibide bat jartzeagatik, baina, argi eta garbi dago, aurten behintzat, ez dela inola ere bete suposizio hori, izan ere, Corina Machado aurtengo Bake Nobel saridun venezuelarrak, nabarmendu du Maduroren gobernuak «egitura kriminala» duela. AEBek egindako eraso zibil eta militarrak txalotu ditu, eta, baita Nicolas Maduro eta Cilia Flores emaztea indarrez bahitu eta eramatea ere. Halaber, Venezuelako Gobernua «narkotrafikoarekin eta pertsonen legez kanpoko trafikoarekin finantzatutako gobernu bat» dela ere salatu du.

AEBek Maduro eta Flores preso eramateaz gain, herrialdearen kontrola ere Washingtonek hartuko duela iragarri Donald Trumpek. «Trantsizio seguru bat» eta «kudeaketa egokia ere egin nahi duela» adierazi du. Baina, AEBetako armadak inbasioa egiterakoan, hildakoak eta zaurituak ere sorrarazi ditu, hau da, biktima errugabeak. Hala eta guztiz ere, Trumpi operazio bikaina eta arrakastatsua iruditu zaio; errepikatzeko modukoa. Bere helburua justizia lortzea omen da. Baina horretarako, adituen arabera, Nazio Batuen Erakundearen Gutuna urratu omen dute, batez ere 1. eta 2. artikuluak: herrialde bakoitzaren subiranotasunaren errespetua, berdintasun juridikoa eta indarraren erabileraren debekua bermatzen dituztenak. Baita NBEren Gutunaren 51. artikulua, alegia, Venezuelak eskubidea duela bere herria eta bere lurraldea defendatzeko.

Bueno, ba, Corina Machado ados baldin badago irregulartasun antidemokratiko horiekin guztiekin, nork sinis lezake Bake Nobel Sari on bat merezi lezakeela?


Zuen iritzi artikulu edo gutuna iritzia@gara.net helbidera bidal dezakezue, word formatuan edo beste formatu editagarri batean. Idatzian sinatzailearen izena, abizenak, telefonoa eta NAN zenbakia agertu behar dira. Iritzi artikuluak eta gutunak sinatzailearen izen-abizenekin argitaratuko dira. Egileak talde baten izenean sinatzen badu, sinatzailearen izenaren azpian taldearen izena agertuko da. NAIZ ez da iritzia sailean argitaratutako edukiez arduratzen.