Augusto enperadorearen plaza berria, zabalik

Augustoren Mausoleoa, antzinako Erromako hileta monumenturik enblematikoenetako bat, 2026. urtearen amaieran zabalduko da. Alabaina, aurreikusitako data iritsi baino lehen Erromatar Inperioaren sortzailearen izena daraman plaza berria inauguratu dute.

«Esku-hartze honekin, herritarrek mausoleoaz beste ikuspuntu batetik gozatu ahal izango dute: munduko monumentu garrantzitsuenetako baten inguruan plaza berri bat sortu da. Mendeetan zehar hiriaren erdigune izan ondoren, ezkutatua eta artxibatua izan zen», gogoratu zuen Roberto Gualtieri Erromako alkateak inaugurazio ekitaldian.

Augusto enperadorearen plaza berriak, 17 milioi euro baino gehiagoko kostua izan duenak, Mausoleoak hiri-ingurunearekin zuen harreman historiko eta bisuala berreskuratu du, XX. mendean egindako hirigintza-esku-hartzeen ondorioz hainbat hamarkadatan isolatuta eta testuingurutik kanpo egon ondoren.

«Sinestezina eta onartezina da Augustoren Mausoleoa bezalako leku bat irisgarria ez izatea», gaineratu zuen alkateak Erromako lehen enperadoreak bere dinastiarentzat duela bi mila urte eraikiarazi zuen hilobi handiari buruz.

Plaza berriaren berritze lanak 2020an hasi ziren. Espazio berriaren eraikuntzan aurkikuntza arkeologiko garrantzitsuak egin ziren, hala nola, egitura berantiarrak, mosaiko zatiak eta marmolezko emakume jainkotiar baten buru baliotsua. Monumentu berean kokatuko dira eta eraikinaren bisitaren parte izango dira.

Mausoleoa, antzinako munduan ezagutzen den hilobi zirkularrik handiena, Augusto enperadorearen eta Julio-Klaudia dinastiako kideen errautsak hartzeko eraiki zen, nahiz eta bere historia luzean Erdi Aroaz geroztik modu askotan erabili izan den: gotorleku, lorategi, anfiteatro, kontzertu-areto...