Arabako gida turistikoa, ‘Viajes National Geographic’ aldizkarian

‘Viajes National Geographic’ aldizkariak Arabako gida turistiko osatu bat argitaratuko du urriaren 21ean, azaroko zenbakiarekin batera, «liluratzen duen» helmuga baten ondare aberatsa, natura eta enogastronomia aitortua ezagutarazteko eta bidaiariak bertaratzera animatzeko.

Arabari buruzko gida urriaren 20tik aurrera kontsulta daiteke argitalpen digitalaren bertsioan, nationalgeographic webgunean. Argitalpenak Arabako Foru Aldundiaren eta Eusko Jaurlaritzaren babesa du. Aurkezpenean azaldu dutenez, aldizkariaren 3,5 milioitik gora irakurleak izan daitezke hartzaileak.

Cristina Gonzalez Arabako Aldundiko Enplegu, Merkataritza eta Turismoko foru diputatuak, Javier Hurtado Eusko Jaurlaritzako Turismo, Merkataritza eta Kontsumoko sailburuak eta Javier Zori ‘Viajes National Geographic’ aldizkariaren zuzendariak aurkeztu dute.

Gonzalezen hitzetan, proiektuaren helburua da «gure ondarea, izaera eta enogastronomia merkatu nazionalean ezagutaraztea, bidaiariak erakartzea, batez ere erdi eta behe denboraldietan, eta, horrela, sektorea urtaro edo sasoi jakin batzuei lotuta ez egoten laguntzea».

Era berean, Hurtadok ziurtatu du Araba dela turismoa hazteko potentzial handiena duen lurraldea. «Azken urteotan, pandemia baino lehenagotik, 2019tik, Araban %25eko hazkundea izan da sarreretan, eta %34koa ostatu gauetan, EAEko hazkundearen gainetik. Horrek enplegua %4 baino gehiago haztea dakar. Eta hori erakundeen apustu irmoari eta baterako lanari esker da», azaldu du.

‘Álava. Patrimonio, naturaleza y gastronomía en un viaje que hechiza’ gida urriaren 21ean banatuko da paperean ‘Viajes National Geographic’ argitalpenaren azaroko edizioarekin batera, ohiko kiosko eta saltokietan eta aldizkariaren 11.000 harpidedunen artean.

Zorik emandako datuen arabera, 3,5 milioi pertsona baino gehiago izan daitezke gidaren hartzaileak: paperezko aldizkariaren 1,5 milioi irakurle eta web atariko 2,1 milioi irakurle.

Ziurtatu du irakurleek Araba moduko helmuga berezi bat baloratuko dutela, «ondarea, gastronomia eta natura harmoniaz uztartzen dituen helmuga bat, esperientzia paregabeak eskaintzen dituena, haietako asko ezezagunak publiko handiarentzat».

«Hori izan da gida honen helburu nagusia: txokorik, paisaiarik eta zaporerik harrigarrienak transmititzea, Arabako erakargarritasun nagusietako hauei balioa emateari utzi gabe: lasaitasuna eta benetakotasuna, egungo bidaiariek gero eta gehiago eskatzen dituzten bi balio», gaineratu du.

Zazpi atal

Gidak, azalean Añanako Gatz Haranaren irudi berezi eta ikonikoa duena, 36 orrialde ditu, zazpi kapitulutan banatuta, Gasteiz, Arabako Errioxa, Añana, Aiaraldea, Gorbeialdea, Arabako Lautada eta Arabako Mendialdea kuadrilletako ondare, natura eta gastronomia eskaintzaren erakargarri nagusiak azaltzeko, irudi ikusgarriz lagunduta.

«Argitalpenak Arabako eskualde guztiak sartzen ditu bisitarien batez besteko egonaldia luzatzeko estrategia baten bidez, eta arrazoiak ematen dizkie bisitatzen gaituztenei gure artean luzaroagoan egoteko, turismo jarduerak eskualde guztietako ekonomian eta enpleguan dituen onurak modu orekatuan banatze aldera», azaldu du foru diputatuak.

Gidaliburua osatzeko, sarrera bat eta Arabako eta zazpi kuadrilletako mapa bat daude, baita azken atal bat ere, non Arabako gastronomiarik onenaz gozatzeko ideiak eta kultura eta kirol ekitaldi garrantzitsuenen egutegia azaltzen diren (Umbra Light Festival, Azkena Rock Festival, Ironman, Jazzaldia, FesTVal, Magialdia).