Euskadi Basque Country aurkeztu die Basquetourrek Herbehereetako turismo sektoreko profesionalei

Basquetour Turismoaren Euskal Agentziaren ordezkaritza bat Amsterdamera joan da Euskadi Basque Country helmuga Herbehereetako turismo sektoreko profesionalei aurkezteko, Eusko Jaurlaritzako Turismo, Merkataritza eta Kontsumo Sailak jakinarazi duenez.

Basquetour Turismoaren Euskal Agentziaren ordezkaritza batek Amsterdamera egindako bidaiaren helburua izan da Euskal Herriaren presentzia sendotzea «etengabeko hazkundea» erakusten ari den merkatu batean, 2025eko urtarriletik urrira bitartean, Herbehereetako turisten sarrerak eta gaualdiak %2 hazi baitira aurreko urteko epe berarekin alderatuta, zifra historikoak lortuz.

Euskal eskaintza turistikoaren aniztasuna

Aurkezpenean, agentziaren zuzendari Daniel Solanak euskal eskaintza turistikoaren aniztasuna aipatu zuen, goi mailako gastronomia, natura, kultura eta hiri turismoa uztartzen dituela eta jasangarritasunarekiko eta ondarearen kontserbazioarekiko konpromisoa nabarmenduz.

Ekitaldia Amsterdameko Sagardi jatetxean egin zen, «euskal gastronomiaren enbaxadore» gisa jarduten duen gunean, hain zuzen. Lokal hori hautatuz, aurkezpenaren mezu nagusietako bat indartu nahi izan zen, hau da, gastronomia funtsezko zutabea dela euskal turismo esperientzian.

Herbehereak gaur egun Euskal Herriarentrzat seigarren nazioarteko merkatu igorlea dira, %2,7ko kuotarekin eta helmugaren balorazio altuarekin, bisitari nederlandarren %99k positiboki kalifikatzen baitu bere esperientzia, eta %84k gomendatuko luke.

Ekintza hau Basquetourren estrategiaren parte da, Euskal Herria helmugaren oihartzuna eta izen ona handitzeko Europako funtsezko merkatuetan, Amsterdam eta Eindhovenekin dagoen aireko konektibitatea eta esperientzia jasangarrienganako interes gero eta handiagoa aprobetxatuz.