Astelehen honetan hasi eta osteguna bitartean lau hitzaldi hartuko ditu Donostiako Intxaurrondo Kultur Etxeak. Bidaia eta esperientzia inspiratzaileen inguruak dira saioak. Haizalde Elkartearen eta Donostia Kulturaren eskutik egingo da Ibiltariaren Astea, aurten 31. edizioa beteko duen ekimena.

Saio guztiak 19.00etan hasiko dira eta sarrera librea izango da, edukiera bete arte. «Jende xehearen esperientzien bidez mundua beste ikuspegi batetik ezagutzea» dute asmo jardunaldiek.

Astelehen honetan Marta Insausti izango da hizlaria ‘Vuelta al mundo en moto a los 55 años: un viaje hacia el alma’ izenburupeko saioarekin. «55 urte beteta munduari bira emateko ausardiaz eta introspekzioz beteriko bidaia. Marta Insausti madrildarra da, bi seme-alaben ama, zortzi anai-arreben artean zazpigarrena eta nahiko borrokalaria. Enpresaria izateaz gain, motorren eta bizitzak planteatzen dizkigun erronken zale amorratua da. 2019an, minbizia gainditu, dibortzio bati aurre egin eta krisi ekonomikoak bere enpresekin nola amaitzen zuen ikusi ondoren, bidean geldialdi bat egiteko unea iritsi zela sentitu zuen. 55 urte zituen, eta, hainbeste pertsona bezala, bere bizitza, lanaren eta familiaren zaintzaren ingurukoa izan zen beti. Motoa betidanik izan da bere pasio handia gaztetatik. Beraz, pentsatu zuen onena hilabete sabatikoa hartzea izango zela, bi gurpilen gainean bidaia txiki bat egiteko. Baina, amets handiekin gertatu ohi den bezala, hasierako plan hura eskuetatik joan zitzaion... eta azkenean munduari bira egiten amaitu zuen. 2019ko irailaren 14an motora igo zen eta, ziurtasun baino zalantza gehiagorekin, abenturari ekin zion. Frantziara ere iritsiko ez zelako sentsazioarekin abiatu zen... baina iritsi eta jarraitu egin zuen. Esperientzia honetan bizi izan duena — zailtasunak, pozak eta bidean ikasi duen guztia — zuzenean kontatuko du, Martak. @lamotera bezalako sare sozialetan aurki ahal da», kontatu dute antolatzaileek.

Asteartean Ione Mariezkurrenak ‘Westfjords, Islandia ezezagunena bizikletaz’ hitzaldia eskainiko du. Islandiako bazter ezezagunenetan bizikletaz barrena egindako abentura, bakardadea eta natura gordinarekin aurrez aurre. «Westfjords eskualdea (ipar-mendelbadeko fiordoak) iskin ezezaguna da Islandian: 7.000 biztanle baino gutxiago bizi dira (batez ere uztaila-abuztuan) 22.270 metro koadroko azaleran, eta gehienak arrantzaleak (makailaua) eta abeltzainak (gizaki bat 20 ardi proportzioan) dira. Ring Road bide sonatua ez da Westfjords-era heltzen eta, beraz, ezta urtero Islandiara iristen diren 5 milioi bisitariak ere. Zentzu horretan, herrialdearen altxorra da, natura basatia gordetzen du bere baitan, ukitu gabea. Errepideen erdiak baino gehiago asfaltatu gabe daude oraindik, eta horrek ere uxatzen ditu turistak. Zirkulu Polar Artikotik 50 kilometro eskasera dagoen Westfjords eskualde honetan, tundrako klima izugarri aldakorra, haizetsua eta hotza da udaberri zein uda betean ere.
Horrenbestez, gogo-gorputzarentzat benetako erronka da munduko bazter hau bizikletaz eta kanpo baliabiderik gabe esploratzea. Hego mendebaldeko areatzek, hegaztiek, fokek, barnealdeko mendate elurtuek, ur-jauzi ikusgarriek, fiordo-segida amaigabeek, goroldio trinkoak eta haitz bolkanikoek, Siberiatik heltzen diren enborrek, zaldi eta artalde egokituek marrazten dute, besteak beste, munduko iskin honen paisaia, zenbaiten hitzetan Europako azken bazter basatia», diote.

Asteazkenen Mikel Perez Colmenarren txanda izango da. ‘10 años de vida nómada’ da bere hitzaldiaren izenburua. Hamarkada bat munduan barrena, mugikortasun iraunkorra bizimodu bihurtuta. «Imajinatzen duzu zure lana utzi eta munduan zehar bidaiatzea? Mikelek ere ez, ‘orain edo inoiz ez’ esan arte. 32 urte zituela, Irun utzi eta hamar urte baino gehiagoz luzatu zen bidaia bat hasi zuen, Europa, Asia, Afrika eta Ozeania zeharkatuz, kultura, paisaia eta pertsona liluragarriak ezagutuz. Abentura harrigarriak bizi izan ditu, erronkak eta zailtasunak gainditu ditu, eta asko ikasi du bere buruari buruz eta bizi dugun planetari buruz. Hitzaldi honetan bere abenturetako pasadizoen bidez erakutsiko du nola bidaiatu daitekeen modu ekonomiko, iraunkor eta benetakoan, eta nola bidaia honek mundua ikusteko modua eta bere burua aldatu zituen. Denborarekin eta norabide finkorik gabe bidaiatzen denean, aukera zoragarria izaten da munduari begiak eta bihotza irekitzeko, den bezala onartzeko, bere aniztasun eta kontraesanekin. Aurkezpen honetan, Asian, Ozeanian eta Afrikan zehar hamarkada batez harrapatu dituen une magikoak ezagutzera gonbidatuko ditu entzuleak. Irudi horien bidez, zapore exotikoak, antzinako tradizioak, arte zirraragarria eta paisaia natural harrigarriak aztertuko ditu», esan dute.

Ostegunean Garbiñek eta Anderren ‘250 egun, tandemen Afrikarantz’ hitzaldia entzun ahal izango da. Tandem batean egindako 250 eguneko bidaia Afrikara, bikote gisa eta bizipenez betetako erronka gisa. «Garbi eta Ander 2022ko irailaren 15ean atera ziren Alegitik, tandem bizikletaz, Afrikara bidean. Behin penintsula zeharkatuta, bizikleta ferryan sartu zuten, eta Maroko zeharkatu zuten Altlasetik, Agadirrera iritsi eta kontinentearen mendebaldeko kostaldetik hegoalderantz abiatu arte. 250 egun eta 8000 bat kilometro egin ondoren, Abidjanera iritsi ziren, Boli Kostako hiriburura. Egunez egun bidaiaren hiru erronka nagusiekin bizitzen ikasi zuten: bikoteko abentura, tandemean bidaiatzea, eta Afrikako kontinenteko egunerokotasuna. Ikusi eta ikasitakoa biltzen duen aurkezpena eskainiko du bikote alegiarrak», azaldu dute.

Herrikoia eta inspiratzailea

Ibiltariaren Astea ez da soilik bidaiarien esperientzien erakustaldi bat; bizimodu, aukera eta ikuspegi ezberdinak partekatzeko gune bat ere bada. Halaxe nabarmendu dute sustatzaileek. «Hitzaldi hauek inspirazio iturri dira publikoarentzat, bai bidaia egiteko grina dutenentzat, bai bizitza berrikusteko gogoan dabiltzanentzat. Intxaurrondo Kultur Etxea berriro ere jakin-minaren eta istorio zirraragarrien topaleku bilakatuko da, lau arratsaldez».