Urtarrilaren 1ean, Bulgaria euroguneko hogeita batgarren herrialdea bihurtu zen. Gehikuntza horrekin aurrera jarraitzen du euroaren zabalkundeak. Hasierako 11 kideei, ondoren, Grezia (2001), Eslovenia (2007), Zipre eta Malta (2008), Eslovakia (2009), Estonia (2011), Letonia (2014), Lituania (2015) eta Kroazia (2023) batu zitzaizkien. Atxikitze segida horrek eurogunearen hedapenaren irudia proiektatzeko balio du, bai eta, beraz, moneta bakarraren botere eta sendotasunarena ere.

Bulgaria Europar Batasuneko lurraldearen %2,5, biztanleriaren %1,5 eta BPGren %0,5 baino ez duen herrialde txiki bat da. Per capita errenta ez da iristen EBko batezbestekoaren bi herenera. Ikuspegi kuantitatibotik, Bulgariaren sarrerak ez dio ekarpen handirik egingo euroguneari. Aitzitik, baliteke Bulgaria izatea eurogunean sartzearen aurkako jarrera handiena izan duen herrialdea. Aldekoen eta aurkakoen artean ia erditik zatituta zegoen herrialdea. Testuinguru horretan, Parlamentuak emaitza zalantzagarriko erreferenduma egitea saihestu zuen, nahiz eta Rumen Radev presidenteak berak aukera hori babestu. Denbora aurrera joan ahala, egonezina areagotu da herritarren artean. Euroa sartu aurreko prezioen igoerak eta 2026ko aurrekontuetan aurreikusitako murrizketek kalera aterarazi zituzten bulgariarrak abenduaren hasieran. Mobilizazio indartsuek Gobernua aurrekontuak bertan behera uztera behartu zuten. Hori ez zen nahikoa izan manifestazioak geldiarazteko eta azkenean Gobernuak dimisioa aurkeztu behar izan zuen. Beraz, Bulgaria Gobernurik gabe eta kontuak zehaztu gabe sartu da eurogunean. Baina horrek Europako instituzioetan ez du askorik axola, hemendik aurrera erakunde horiek moneta, zerga eta aurrekontu politikak gidatu ahal izango baitituzte inolako oztoporik gabe. 

Dimititu duen Gobernuari dagokionez, ez dago argi nori egotziko dioten euroa ezartzearen kostu politikoa; izan ere, prezioak igo eta bizi baldintzak gogortuko dira. Horri euroaren ezarpen prozesuak izan duen defizit demokratikoa gehitu behar zaio. Grezian gertatutakoa ikusita, hasiera horrek ez du ezer onik iragartzen, ez Bulgariarentzat, ez euroarentzat.