Bertsularien Lagunak elkarteko kideek 2023ko taldekako Xilaba aurkeztu dute astearte honetan, Baionan. Irailaren 22an Ozazeko herriko gelan eginen den saioarekin emanen diote hasiera taldekako ligaxkari, hilabete bat iraunen duena. Ondotik, bi finalerditan lehiatuko dira bertsulariak, Aiherrako final handirako pasea lortzeko, azaroaren 18rako.

Osotara 38 parte hartzaile izanen dira, 9 taldetan banatuak. Bertsularien Lagunak elkarteak oroitarazi duenez, hainbat saiakeren ostean 2018an erabaki zuten Xilaba taldekako formatuan lehiatzea, «egitura familiarragoa» eta «txapelketa herrikoiagoa» ahalbidetzen duelakoan.

Taldearen gerizpea

Taldekako txapelketa «usaiako eta ez hain usaiako bertsulariak elkartzen dituen jostetarako lehia» gisa deskribatu dute antolatzaileek, bertsulari zahar zein berriek eman baitute izena. Elkarteko kide Ortzi Idoatek zehaztu duenez, «talde kasik guztietan badira gazteak, 18 eta 20 urte artekoak, eta geroz eta neska gehiago daude, guretzat lorpen bat da». Joan den edizioan 12 neska ziren, eta oraingoan 16ra igo da kopurua.

Prestaketa eta lehiari dagokionez ere, taldean egoteak seriostasuna eta zurruntasuna arintzen duela azaldu dute Bertsularien Lagunek. «Segur da parte hartzea errazten duela, taulara ia inoiz igotzen ez diren bertsolariek hartzen dute parte» adierazi du Ortzi Idoatek; «taldekakoaren ideia zen ere txapelketaren eremua jende gehiagori zabaltzea eta esperientziak frogatu du balio izan duela, bakarkakoan parte hartzen ez zuten belaunaldi batzuk iritsi baitira taldekakora» poztu da Maindi Murua.

Ekipen osaerari begira, talde ahalik eta naturalenak osatzea dute xede; «batzuek egiten ahal zituzten talde oso azkarrak beraien artean, baina ongi ulertu dute izpiritua eta gazteagoen bila joan dira» gaineratu du Idoatek.

Auzolanean oinarrituriko txapelketa

Elkarlana sustatzearekin batera bertsularitza hedatzeko asmoz, saio guztiak herriko egitura batekin antolatuak izanen dira: «lehia antolatzeko modu honekin iristen gira ostatu, elkarte eta normalean iritsiko ez ginatekeen hainbat egiturengana».

Taldeak parez-pare ezarriko dituen ligaxka irailaren 22an abiatu eta urriaren 20arekin amaituko da. Hiru multzotan banatua izanen da, hots, A, B eta C multzoetan, eta multzo bakoitzak hiru talde barnebilduko ditu.

Ligaxkaren hilabetean zehar, talde bakoitzak saio bat antolatzeko ardura ukanen du, beste multzoko saio batean gaiak eman eta epaile lanak egiteaz gain. Hain zuzen, final erdietara arte, beste multzoetako taldeetako bi kide eta publikotik hautaturiko bertsozale bat izanen dira epaile.

Ondotik, finalerdiak urriaren 28an Muskildiko Posonpesenean eta azaroaren 4an Azkaineko Kiroletan izanen dira, biak ala biak bertako ikastolek eskainiriko taloekin. Finalerako hitzordua azaroaren 18an eman dute, Aiherrako herriko gelan. Bazkari herrikoia izanen da aitzin, 12.30ean, eta 17.00etan abiatuko da saioa.

Finalerdi zein finalean, Bertsularien Lagunak elkarteko kideak ariko dira gai-emaile eta epaile lanetan.