Poloniako musika da Euskadiko Orkestrak hilaren 24tik 29ra hiru euskal hiriburuetan eskainiko duen kontzertu-programa berriaren ardatza.

«Seigarren kontzertu-programan naturaz gaindiko gaiak berreskuratuko dira, Beatriz Arzamendiren Sorginen soinuaren sonoritate bihurriekin. Ondoren, aldiz, egitarauak poloniar traza hartuko du», iragarri dute Orkestrako arduradunek.

Lehenik eta behin, bi artista gonbidatuengatik: Lukasz Borowicz zuzendaria, Poznango Orkestra Filarmonikoko titularra eta Krakoviako Filarmonikako zuzendari gonbidatua; eta Rafal Blechacz, egungo piano-izarretako bat, Varsoviako Chopin lehiaketa 2005ean irabazi eta gero. Camille Saint-Saënsen Pianorako 2. Kontzertua joko dute elkarrekin eta, horren ostean, Poloniako musikako maisulanetako bat: Karol Szymanowskiren 2. Sinfonia.

Errepertorioak, gainera, 2024/25 denboraldiak markatzen duen naturaz gaindiko gaian sakonduko du, Beatriz Arzamendi konpositore gipuzkoarraren ‘Sorginen soinua’ interpretatuz.

2024/25 denboraldiko seigarren programa da. Urtarrilaren 24an eta 27an Donostiako Kursaal Auditorioan, 28an Gasteizko Jesus Guridi Kontserbatorioan eta 29an Bilboko Euskalduna Jauregian eskainiko du Euskadiko Orkestrak. Oraingoan ez da kontzertu bera izango Iruñeko Baluarte auditorioan, baina, horren ordez, otsailaren 28an ‘Aldave/Szymanowski’ izeneko egitarau alternatiboaz gozatu ahal izango da, Borowicz poloniarrak ere zuzenduko duena.

«Gaur egun, ez da askotan oroitzen Poloniatik kanpo. XX. mendearen hasieran, ordea, oso ospetsua izan zen mundu osoan horrelako sorkuntza-lanei esker, kontrapuntu-lan trinkoa eta poloniar itxurako lirismoa nahasten ditu eta», esan dute.