EDA Drinks&Wine Campuseko egoitzen diseinu proiektuak aurrera jarraitzen du aurreikusitako ibilbide orriaren arabera eta abenduan hasiko dira Guardia eta Gasteizko egoitzen obrak.

Hala iragarri dute proiektuan parte hartzen duten eragile eta erakundeek, asteazken honetan bi egoitzak osatzen dituzten espazioen xehetasunak eta proiektuaren garapenari buruzko datuen aurkezpenean.

‘Mugarik Gabe’ izena du Carvalho Araujo arkitektura estudio portugaldarrak egindako proposamenak. Diotenez, «Gasteizko eraikinak plaza bat iradokitzen du: topagune bat parte-hartzera irekia eta elkartasunerako gunea. Biasteriko espazioa, aldiz, komunitatea indartuko duen erreferentziazko gune bilakatuko da».

Bi eraikinen berezitasuna eta ingurunearekiko integrazioa izan ziren aukeraketa prozesuan gehien baloratu ziren irizpideak. Bi eraikinek estalki eta azpiko solairuak dituzte, paisaiaren eta jasangarritasunaren bitartekari gisa jarduten dutenak. Eraikinen zati bat lurrazpian dago, masaren eta inertzia termikoaren abantailak baliatuz, izan ere, espazio batzuek —zahartze-guneak, ekoizpen aretoak, biltegiak eta abar— tenperatura fresko, egonkor eta kontrolatuak behar dituzte.

Araujok azaldu duenez, «bi eraikinek partekatzen duten estalki berdearen sistemak eguzkiaren eragina arintzen du, eta barne tenperatura kontrolatuz energia beharrak murrizten ditu, eraikinaren eraginkortasun eta errendimendua hobetuz».

Gasteizko eraikina

Gasteizko eraikinak 4.000 metro karratu erabilgarri izango ditu eta prestakuntza esparrua izango da nagusi. Bertan, analisi sentsorialeko gela bat, lau laborategi (kromatografia, fisika eta kimika, eta mikrobiologiakoak zehazki), zortzi tailer eta auditorio bat egongo dira. Horrez gain, ia 900 metro karratuko espazioa izango du solairu pilotuarentzat, eta bertan ikasleek ekoizpen prozesuetan dituzten ezagutzak praktikan jarri ahal izango dituzte, destilazioa, hartzidura eta bestelako esparruetan.

«Lantegi pilotua bi eraikinek partekatzen duten funtsezko espazioetako bat izango da, eta ikasleek, ekintzaileek eta sektoreko bestelako eragileek ekoizpen prozesu ezberdinak ikasi eta esperimentatzeko gune izango dute. ‘Learning by doing’ (eginez ikasi) metodologia jarraituz, ikasleek praktikaren bidez barneratuko dituzte edukiak. Filosofia horren harira, espazioak nano instalazioetan oinarrituta diseinatu dira, eraikineko erabiltzaileek euren ezagutzetan sakondu ahal izan dezaten jardun praktikoaren bidez», azpimarratu dute.

Guardiako egoitza

Guardiako eraikinak, berriz, 2.500 metro karratu erabilgarri izango ditu, eta ekintzailetza izango du ardatz nagusi. Bertan, besteak beste, analisi sentsorialeko gela bat, bi laborategi (bat mikrobiologiakoa eta bestea fisika eta kimikakoa), lau tailer eta auditorio bat egongo dira. Gainera, 700 metro karratu baino gehiago izango dira solairu pilotuarentzat, eta bertan ardogintzari eskainitako eremuak egongo dira, hala nola hartzidura eta zahartze guneak.

Horrez gain, 500 metro karratu inguruko espazioak ekintzailetzari zuzenduta egongo dira, eta horiek izango dira startup-ek beren proiektuak garatzeko tokia. Ekintzailetzari eskainitako gune honek sei gela izango ditu, non proiektu desberdinek euren produktuak aurkeztu eta garatu ahal izango dituzten. Espazio horren funtzionamendua eraikinaren eguneroko jardueratik independentea izango da.

Bi taberna

EDAk bi taberna izango ditu, wine bar bat izango du Guardian eta drinks bar bat Gasteizen. Bi esperimentazio gune horiek herritarrentzako irekita egongo dira, eta Basque Culinary Center-en ikaskuntza ereduaren arabera funtzionatuko dute. Horrela, ikasleentzako praktika gune gisa balioko dute, eta aldi berean, ekintzaileentzako teknologia eta soluzio irekiak probatzeko espazio gisa ere jardungo dute. 

Gasteizko egoitza edarien munduan zentratuko da, hala nola destilatuetan, garagardoetan, hartzidunetan, NOLO edarietan, besteak beste. Guardiakoa, berriz, ardogintzaren sektorean espezializatuko da. Bi espazioetan garatuko dira prestakuntza jarduerak, besteak beste: Ardo eta Edarien Gradua, espezializaziozko masterrak, graduondoko ikastaroak eta doktorego programa, guztiak Basque Culinary Center-en Mondragon Unibertsitateko Gastronomia Fakultatearen eskutik.

Horrez gain, herritarrei zuzenduriko hainbat jarduera eta ekitaldi ere burutuko dira: dastatze ikastaroak, edariak nola prestatu ikasteko tailerrak, gastronomia eta edari arteko uztarketak eta abar.