«Erakusketak elementu tradizionalak izango ditu, hala nola testua eta irudiak, baina, era berean, eszenografia murgiltzaileagoa erabiliko da, esperientzia hezigarria ez ezik, bizipenezkoa ere izan dadin», esan du Quirinaleko Scuderie museoko zuzendari Matteo Lafranconik. Izan ere, museo horretan izango da ikusgai erakusketa 2026ko urriaren 24tik maiatzaren 3ra bitartean.

Lafranconik azaldu zuenez, Egiptoko hainbat museotatik datozen lanak, hala nola Kairoko Egiptoar Museotik eta Luxorreko Museotik, hiru aste barru irten daitezke herrialdetik, betiere kontserbazio eta zaintza estandar zorrotzenen menpe.

Kairoko Egiptoar Museoan emandako prentsaurrekoan, Lafranconi eta Mohamed Ismail Antigoaleko Gauzen Kontseilu Goreneko idazkari nagusia buru zirela, nabarmendu da erakusketak «panoramika aparta» marraztuko duela, zibilizazio faraonikoaren sorreratik abiatuta. Azken urteetako aurkikuntza arkeologiko esanguratsuenetako batzuk ere erakutsiko direla aurreratu zuten aurkezpen ekitaldian.

Egiptoko gizartearen konplexutasuna

Sei atal tematikoren bidez, erakusketak Egiptoko gizartearen konplexutasuna, faraoien autoritate jainkotiarra, eguneroko bizitza, sinesmen erlijiosoak eta hileta-praktikak aztertuko ditu.

Gainera, antzinako Egipto «historiako zibilizazio erakargarrienetakoa» bihurtu duten sofistikazio artistiko aparta eta espiritualtasun sakona azalduko ditu, aurkezpenean esan zutenez.

Erromara bidaiatuko duten tresna nabarmenen artean, Antzinako Erresumaren eskultura bat dago, ‘Micerinoren Triada’ izenekoa, faraoia irudikatzen duena Hathor jainkosa eta tebastar eskualdeko jainko babeslea alboan dituela. Halaber, Ahnotep erreginaren urrezko hilkutxa egongo da ikusgai, bere lepokoetako batekin batera (gerlari handientzat gordetako ohorezko sari militarra), eta errege bitxiak zein eguneroko objektuak.

«Lorpen bat da, objektu arkeologiko asko Italiara iritsiko direlako lehen aldiz», azaldu zuen Ismailek, zeinak aitortu zuen kultura-truke horren helburua Egiptora turista gehiago erakartzea ere badela.