Durangoko Azokaren 60. edizioko egitarauaren aurkezpenean aurreratu dute Landako Gunean 285 erakusmahai ipiniko dituztela aurten. Guztira, 175 partaide eta 1.026 kultur nobedade egongo dira; horietatik 694 liburuak izango dira, 163 musika ekoizpenak, 30 aldizkariak eta 139 bestelako ekoizpenak. Gainera, lan berriak aurkezteko 273 ekitaldi programatu dira.

Aurkezpen ekitaldia Durangoko Museoan egin da, azoka egunetan Atartea gune berria hartuko duen aretoan, hain zuzen ere.

Bertan izan dira egitarauaren antolaketan lanean ari diren arduradunak: Beñat Gaztelurrutia (Gerediaga), Gotzon Barandiaran (Ahotsenea), Irati Agorria (Irudienea), Diana Franco (Kabia), Itxasne Arabiourrutia (Saguganbara), Maider Larrañaga (Szenatokia), Aitor Agiriano (Azoka Telebista) eta Garazi Arrizabalaga (Durangoko Museoa).

«Sortzen doazen adierazpen eta korronte berrietara moldatzen ari da euskal kultura, eta horren atzetik, euskarazko sorkuntza bultzatu eta hauspotzeko asmoz lanean dihardu Durangoko Azokak, esku artean dugun Kulturaren Jaialdi hau ahalik eta anitzena eta koloretsuena izan dadin», azaldu du Beñat Gaztelurrutiak.

60. urteurrenarekin batera, Durangoko Azokak zenbait berrikuntza sartu ditu, nahiz eta aldaketa horiek ez dioten urteurren baten ospakizunari erantzuten, Azokak sei hamarkadetan zehar egindako ibilbidearen noranzkoari baizik, «ingurura moldatzen joan baita etengabe azoka, euskal kulturaren berritasunei egokitzen eta arte adierazpen berriak batzen».

Bi gune berri

Horregatik, aurten bi gune berri izango ditu Durangoko Azokak: Berbagailua (Podcasten Plaza) eta Atartea (Arte Ederren Plaza). Horrekin batera, aurten nobedade bezala, azoka itxi eta gero egitarauak jarraipena izango du.

Hasteko, gauetako kontzertuak izango dira berriro: abenduaren 5ean, Lukiek eta Ezezez arituko dira eta 6an, berriz, Mirua eta Naxker. Gainera, 6an Behe Bandakoen errezitaldia eta bostOK konpainiaren emanaldi bat ere egongo da iluntzean.

Azkenik, abenduaren 7an izango dira Formol laborategiaren ikuskizuna, Bittor Kapanaga kulturgilea omentzeko ekitaldia eta ‘Gaua’ filmaren emanaldia Paul Urkijo zuzendaria bertan dela. Egitarau osoa Azokako webgunean kontsulta dezakete zaleek.