Sadar beteta izango da igandean. Osasuna eta Realaren arteko derbiak ikusmina piztu du zaletuengan, eta sarreren salmentetan nabarmena izan da horrek izan duen eragina.

Atzokoan Iruñean hiru ordutan agortu ziren sarrera guztiak eta norgehiagoka zuzenean ikusteko azken aukera gaur goizean Anoetan salgai jarri diren 100 sarreretan zegoen. Horiek ere, Realak bere Twitter kontuan adierazi duenez, berehala agortu dira.

Gaua lehiatilaren aurrean igaro dute hainbat zalek. Goizeko 09.00etan zabaldu da sarrerak erosteko aukera eta ziztu batean amaitu dira.