«ERT gaur gaueko programazioarekin desagertuko da. Bere ordez, ahalik eta azkarren abian jarriko da beste erakunde publiko bat, askoz ere langile gutxiagorekin», adierazi du Gobernuko bozeramaile Simos Kedikogluk.

Bere esanetan, langileak kanporatuak izango dira eta bakoitzari dagokion kalte-ordaina emango zaio.

Erakunde berrian lan egin nahi duten langileek hautagaitza aurkeztu beharko dutela esan du bozeramaileak, baina ez du zehaztu zenbat behargin kontratatuko dituzten.

Egun 2.600 langile ditu ERT irrati-telebista publikoak eta, tokiko hedabideen arabera, 700 pertsonetara murriztuko du Gobernuak kopuru hori.