Biarritzeko alkatetzarako hautagai Max Brissonek (UMP) salaketa jarri zuen pasa den ostiralean udal hauteskundeetan irregulartasunak egon zirela ohartaraziz. Joan den martxoaren 30ean Michel Veunac hautagai zentristaren aurka herriko bozak galdu ondoren, Brissonek salaketa jarri zuen, bigarren itzulian izenpetu zuten 200 bozkatzaileren sinadurak lehen itzuliarekiko desberdinak zirela argudiatuz.

Sinadura horien azterketa egin du prefetak salaketaren ondoren eta «zenbait desberdintasun» aurkitu dituela onartu du, baina guztiak agerikoak eta beste hainbat herritan ere gertatutakoak. Gehienak «desberdintasun txikiak» direla esan du.

Bigarren itzuliaren ondotik, 425 bozetako tartea geratu zen Max Brisson eta Michel Veunac hautagaien artean.