Gabriel Viedma UPNko zinegotziak ‘Diario de Noticias’ egunkariari aurreratu dionez, Iruñeko Udalak baimena eman dio Gora Iruñea plataformari aurten ere sanferminetako jai gunea Runa parkean izan dezan.

Zinegotziak esan duenez, kontratazio mahaiak onartu du Gora Iruñeak egindako proposamena –200.000 euroko aurrekontuarekin– eta falta zitzaizkion tramite administratiboak ere bete ditu. Erabakia datozen egunotan egingo da publiko, ofizialki, egunkari horren arabera.

Gora Iruñeak maiatzaren 29an aurkeztu zuen sanferminetarako prestatu duen egitaraua. Iruñeko Udalak Runa parkea esleitzeko ireki zuen lehiaketa publikoa esleitu gabe geratu da eta horren ondotik etorri da plataformaren aukera, iaz bezala.