Uste baino askoz errazago lortu du Jokin Altunak final laurdenetan Martinez de Irujoren aurka jokatzeko aukera, Victorri 3-22 irabazi ostean.
Esan daiteke aldagelatik irabazi duela lehia Aspekoak, errioxarra bere onetik atera baitu. Saketik min ikaragarria egin dio, denera zortzi tanto lortu baititu lehen pilotakadarekin. Piloteoan bezala, bikain asmatu du Victorren eskuina ekiditeko, pilota ezker paretara uneoro bilduz, eta errioxarrak ez du erantzuten jakin.
Tantoak amaitzerako orduan ere, arriskatu behar handirik ez du izan, Victor aurreregi jarri baita kantxan eta sarri buruzgain pasatu baitu. Atzo Sorian bezala, historia gutxiko partida izan da gaur Tolosakoa, 32 minututan eta 135 pilotakadetan amaitu dena.