Asier Aiestaran

Santurtzi izan da nagusi Bermeoko denboralean eta Liga ia ziurtatuta utzi du

Ia estropada osoan lehen txandan Zierbenak egindako denborak izan dira onenak, baina azken luzean egoera irauli du "Soterak" emozioz betetako garaipena lortzeko. Igoera play-offean Tolosaldea eta Getaria izan dira helburua oso bideratuta utzi dutenak.

Gorka Aranberri patroia, Bermeoko ikurrina amorruz astintzen (Monika DEL VALLE / FOKU)
Gorka Aranberri patroia, Bermeoko ikurrina amorruz astintzen (Monika DEL VALLE / FOKU)

Aurreko asteburuan Kontxako ur lasaietan, edo gaur Bermeoko denboralearen erdian. Berdin-berdin dio Santurtziri, bizkaitarrak konfiantzaz beteta daudelako eta garaipen gose ikaragarria erakusten ari direlako. “Soterak” emozioz betetako Bermeoko Bandera irabazi du gaur eta nahikoa du bihar estropada amaitzea bigarren urtez jarraian Eusko Label Liga irabazteko.

Ez da garaipen erraza izan Santurtzirena. Lehen txandan Zierbenak denbora bikaina markatu du (21:28.04) eta haizeak gora egiten jarraitzen zuenez erreferentziak “galipoen” aldekoak izan dira ia uneoro. Une batean hamar segundoko abantaila ere izan du Zierbenak, eta Gorka Aranberri Santurtziko patroia entzun dugu bere mutilei bandera ezinezkoa zela eta helburua txanda irabaztea zela esanez.

Baina antza denez azken luzean haizeak barealditxo bat izan du eta Santurtzi Zierbenari segundoak jaten joan da palada bakoitzean. Bost, lau, hiru, bi, bat… eta helmugan santurtziarrek Zierbenak baino bi segundo denbora hobea markatu dute: 21:25.78.

Ia-ia Kontxa irabazi zutenean baino gehiago ospatu dute moreek garaipena, gaurkoa beraientzat estropada berezia zela erakutsiz. Alde batetik, Bermeon ibilitako kide asko daudelako gaur egun Santurtzin –Iker Zabala entrenatzailea, Gorka Aranberri patroia edota hainbat arraunlari–. Eta bestetik, Ligako garaipena ziurtatuta uzteko modurik onena zelako gaur irabaztea.

Azkenean Hondarribiak hirugarren postuarekin konformatu behar izan du, santurtziarrengandik zazpi segundora, eta Ligako sailkapen nagusian 8 puntuko aldea dago bien artean: 205 bizkaitarrek eta 197 gipuzkoarrek. Ohorezko txanda osatu duten Orio eta Donostiarra bosgarren eta seigarren izan dira, hurrenez hurren, lehen txandan aritu den Bermeok laugarren postua eskuratu duelako.

Gaurko kuadrilla irabazlea, Kontxako bigarren jardunaldian arraun egin zuen berdina, hauxe izan da: David Duran, David Iglesias, Oscar Andres Medina, Javier Sayans, Andoni Garcia, Jon Etxaniz (estriborrean), Yeray Cayon, Fernando Rua, Fernando Ruiz, Diego Hermo, Sorin Silviu, Ander Zabala eta Mikel Azkarate (baborrean), Gorka Aranberri patroi zutela.

Tolosaldea eta Getaria, indartsu play-offean

Eusko Label Ligako estropadaren aurretik igoera play-offetako lehen jardunaldiak jokatu dira, eta Tolosaldeak eta Getariak sekulako kolpea eman dute, batez ere Tolosaldeak emakumezkoen lehian.

Hondarribiaren, Euskotren Ligako ordezkariaren, eta Tolosaldearen, ETE Ligako txapeldunaren, artean borroka parekatua espero genuen arren, tolosarrek sekulako nagusitasunez irabazi dute nesken erlojupekoa. Patxi Francesek prestatzen duen ontzia bikain moldatu da Bermeoko baldintza zailetan eta 11:38.52ko denbora markatu du helmugan. Hondarribiak, aldiz, arazo asko izan ditu ibilbide guztian eta hirugarren izan da 17 segundora.

Bigarren postua Deusturentzat izan da, ETE Ligako beste ordezkariarentzat, baina tolosarrengandik 11 segundora sartu da eta txartel bakarra dagoenez jokoan, ia ezinezkoa dirudi bigarren jardunaldian alde horri buelta ematea. Cabo izan da laugarren sailkatua, 27 segundora.

Mutilen lehian, Getaria izan da indartsuena, KAE Ligako txapelduna. Jon Larrañagak prestatzen duen kuadrilla bikain moldatu itsaso zakarrean eta zenbait unetan hamar segundoko aldea ere izan du bigarrenarekiko, baina azken unean indartu den haize zakarrak kalte egin die gipuzkoarrei.

Azkenean, getariarrek 21:25.56ko denbora sinatu dute, Samertolameu izan da bigarren 4.06 segundora eta Kaiku hirugarren 4.42ra. Hiru ontzi horien artean aldeak oso txikiak dira eta edozer gerta liteke, jokoan diren bi txartelen borrokan. Aukerarik gabe geratu direnak Tiran eta Bueu izan dira, 18 eta 23 segundora, hurrenez hurren.

Bigarren jardunaldia bihar jokatuko da Portugaleten, 11.20an hasita.

Sailkapenak

    Bermeoko Ikurrina
    1.     Santurtzi        21:25.78
    2.     Zierbena        21:28.04
    3.     Hondarribia    21:32.92
    4.     Bermeo          21:36.10
    5.     Orio               21:44.22
    6.     Donostiarra    21:49.18
    7.     Ondarroa        22:03.68
    8.     Cabo              22:16.02

    Eusko Label Liga
    1.     Santurtzi         205 puntu
    2.     Hondarribia     197
    3.     Donostiarra     169
    4.     Orio                166
    5.     Zierbena         162
    6.     Bermeo          145
    7.     Ondarroa        107
    8.     Cabo               97

    Igoera play-offa (g)
    1.     Getaria               21:25.56 (5 puntu)
    2.     Samertolameu    21:29.62 (4)
    3.     Kaiku                 21:29.98 (3)
    4.     Tiran                  21:44.14 (2)
    5.     Bueu                  21:49.04 (1)

    Igoera play-offa (e)
    1.     Tolosaldea         11:38.52 (4 puntu)
    2.     Deustu              11:49.68 (3)
    3.     Hondarribia        11:56.12 (2)
    4.     Cabo                  12:06.46 (1)