Bilboko Otxarkoaga auzoan kokatutako Udal Etxebizitzak-en Otxar Open Gela zentroan arte-sorkuntzarako espazio berri bat zabaldu da, aurretik BilbaoArte-n lan egin duten artisten estudioa izango dena. Proiektuak etengabe txandakatu daitezen, gehienez lau artistek edo kolektibok partekatu ahal izango dute gune hau euren lanak sortu ahal izateko.

Asteazken goizean Gonzalo Olabarria, Bilboko Kulturako eta Gobernantzako zinegotzia, eta Jon Bilbao, Etxebizitzako zinegotzia, zentro berri honetara bertaratu dira. Eider Bilbao, Udal Etxebizitzak-en zuzendari nagusia, eta Javier Riaño, BilbaoArte-ko zuzendaria, beraiekin izan dira. Han, Bizkaiko hiriburuan aitzindaria den espazio berri honen funtzionamendua ezagutu dute eta, gainera, bertan proiektuak garatzen dituzten artisten esperientziak ikusi dituzte.

Udalarentzat, ekimen hau eraikin berezi honi bizitza berri bat emateko aukera bat izan da, BilbaoArte-k garatzen duen artearen alorreko premia hirian zehar zabaldu ahal izateko. Estreinako aldia da artistek Urazurrutiako egoitzako instalazioetatik kanpo lan egiten dutena. Helburua da, aipatu dutenez, Bizkaiko hiriburuaren arte-panorama berritzailearen erreferente bihurtzea, eta kultur jarduerako leku bat izan dadila, arte-lengoaia garaikideekin eta lankidetzarekin lotua.

Ekimen pilotu gisa abian jarri zenetik, hamaika artistek lan egin ahal izan dute bertan: Estíbaliz Sádaba, Amaya Suberviola, Rocío Agudo, Jon Ander Terroba, Ismael Iglesias, Jimena Kato, Javier Bravo, Alejandría Cinque, Nora Aurrekoetxea, Gari Arambarri eta Lucía Chamorro.

Etxebizitzak artistentzat

Honez gain, Udal Etxebizitzak elkarteak Bilbao Arte Fundazioarekin lankidetzan dihardu 2012tik. Urtero Bilbon egonaldi artistikoak egiten dituzten bederatzi artista gazteri hiru etxebizitza uzten diete, zentroak sustatzen dituen beka eta trukeei esker.

«Otxar Open Gelaren xede nagusia da auzoko bizilagunentzako hurbileko bulego gisa jardutea, hiria berroneratzeko eta eraikinak birgaitzeko Orain Otxar proiektuaren esparruan, Otxarkoaga ekoauzo jasangarri bihurtzeko», udalaren esanetan.

Testuinguru horretan, jarduera soziokulturalak garatzeko gune bat ere bada, eta eragile publiko eta pribatuak inplikatzen ditu, hala nola Bilbao Arte ekimena.