NAIZ

Baldintzapean aske da Txutxo Gomez Ezkerro iruindarra, 22 urtetik gora preso eman ostean

Zigorraren hiru laurdenak aspaldi beteta zituen Jesus Mari Gomez Ezkerro iruindarrak baldintzapeko askatasuna eskuratu du azkenik eta ez da espetxera itzuliko beharko. Hogei urte baino gehiagoko kartzelaldia utzi du atzean.

Berriozartik Iruñeko espetxerako martxa, presoak askatzearen alde, 2020ko abenduan.
Berriozartik Iruñeko espetxerako martxa, presoak askatzearen alde, 2020ko abenduan. (Jagoba Manterola | Foku)

22 urte baino gehiago preso eman ostean, baldintzapeko askatasuna lortu du Jesus Mari «Txutxo» Gomez Ezkerrok, Iruñeko Arrotxapea auzokoa denak. Etxeratek jakinarazi du asteazken honetan.

2021. urteko irailetik hirugarren graduan zen Gomez Ezkerro. Espainiako Gobernuaren menpekoa den Espetxe Zuzendaritzak onartu zion baldintzapeko askatasuna, eta une berean Asturiasko Villabonatik Euskal Herrira ekarri zuen. Iruñeko kartzelan eman du espetxealdiaren azken zatia. Aurretik urte ugari eman behar izan zituen Galiza aldean, A Coruñako Teixeiron hain zuzen ere.

Zigorraren hiru laurdenak aspaldi beteta zituen Iruñeko presoak. 1998. urtean atxilotu zuen Guardia Zibilak Iruñean egindako sarekada batean, eta 2001. urtetik aurrera espetxean izan da beti.

Erabaki honen ostean zortzi dira Nafarroako hiriburuko kartzelan diren euskal preso politikoak, eta 171 izen-abizen biltzen ditu Etxeraten zerrendak.