NAIZ

Euskal derbia Anoetan jokatuko dute Realak eta Athleticek apirilaren 2an, 12.00etan

Talde txuri-urdinak gaur jakinarazi du Athleticen aurkako partida Anoetan jokatuko dela. Ligako lehenengo itzuliko derbian ere San Mamesen aritu ziren, eta donostiarrak aise nagusitu ziren 1-3. Pasa den denboraldian ere Anoetan jokatu zuten, eta txuri-urdinek irabazi zuten 1-0.

Athleticek eta Realak denboraldi honetan San Mamesen jokatu zuten derbian.
Athleticek eta Realak denboraldi honetan San Mamesen jokatu zuten derbian. (Aritz LOIOLA | FOKU)

Realak eta Athleticek Anoetan jokatuko dute euskal derbia apirilaren 2an, 12.00etan. Hala jakinarazi du astelehen honetan talde txuri-urdinak sare sozialen bitartez. Ligako lehenengo itzulian San Mamesen jokatu zuten elkarren aurka, pasa den azaroan, eta Natalia Arroyoren jokalariak aise nagusitu ziren 1-3, Amaiur Sarriegi (1) eta Gaby (2) izan ziren goleatzaileak.

Realak hirugarren aldiz jokatuko du sasoi honetan Anoetan, eta txuri-urdinak saiatuko dira aurrez bertan jokatutako bi partidetan lortu ez duten garaipena eskuratzen. Izan ere, Txapeldunen Ligako kanporaketa Bayern Munichen aurka 0-1 galdu zuten, eta Levanteren aurka ere ez zuten irabazterik lortu, 3-4.

Pasa den denboraldian ere Anoetan jokatu zuten derbia zuri-gorrien aurka, eta 1-0 gailendu ziren donostiarrak, Nerea Eizagirrek sartutako gol bati esker.

Athletic goranzko bidean, Reala kontrakotik

Iraia Iturregiren taldeak bolada txarra etetea lortu zuen pasa den asteburuan, Sporting de Huelvari 2-3 irabazita, bost partida jarraian kateatu baitituzte irabazi gabe. Donostiara joan baino lehen, ordea, hitzordu garrantzitsua dute ostegun honetan Sadarren: Osasunaren aurka ariko baitira Kopako final-laurdenetan, 18.30ean.

Athleticek goranzko norabide hartu duen moduan, Reala kontrako bidetik doa: pasa den asteburuan Athletico de Madrilen aurka 1-2 galdu zuen Zubietan, eta hala hiru partida jarraian doa garaipena lortu ezinik. Derbiak balio beharko die motibazioa hauspotzeko, eta garaipena erdiesteko.