Motorren orroa, muturreko abiadura eta pista barruko zein kanpoko drama zinemara helduko dira ‘F1: The Movie’ (‘F1: La película’, gazteleraz) filmarekin, Joseph Kosinskik zuzendutako proiektu berria; 1 Formulako zaleek gozatuko duten estreinaldia izango da.  Gainerako ikusleek ere osagarri erakargarriak topatuko dituzte: Brad Pitt protagonista,  Hans Zimmer-en soinu banda eta erritmo frenetikoa duen gidoia.

Sonny Hayes (Brad Pitt), ‘inoiz izan den handiena’ ezizenaz ezaguna, 1990eko hamarkadan etorkizun handienetakoa zuen 1 Formulako pilotu bat izan zen, baina pistan izandako istripu batek bere ibilbidea ia eten zuen. 

Istripua izan eta 30 urtera, Sonny Hayesek Ruben Cervantesekin (Javier Bardem) egingo du topo, bere taldekide ohia izandakoa. Gaur egun, Cervantesek arazo ekonomikoak dituen 1 Formulako talde baten jabetza du. Egoera horretan, Cervantes Hayes konbentzitzen saiatuko da pistetara itzul dadin: taldearen egoera salbatzeko ez ezik, baita Hayesen benetako talentua eta oraindik txapeldun izateko gaitasuna duela erakusteko ere.

Joseph Kosinski da pelikularen zuzendaria (‘Top Gun: Maverick’) eta Brad Pitt, Javier Bardem, Damson Idris, Kerry Condon, Tobias Menzies eta Kim Bodnia dira protagonistak. 

Akzioa, emozioa eta abiadura izango dira osagai nagusiak, Hollywoodeko zigilua eta munduko kirol ikusgarrienetako baten zirrara uztartuta. 

Benetako lasterketak

Filma benetako 1 Formulako Sari Nagusiko lasterketetan grabatu dute, besteak beste, Hungaroringen (Hungaria), Spa-Francorchamps zirkuituan (Belgika), Monzako autodromo nazionalean (Italia), Zandvoort zirkuituan (Herbehereak), Suzukako nazioarteko zirkuituan (Japonia), Las Vegasko kale-zirkuituan (AEB), Yas Island zirkuituan (Arabiar Emirerri Batuak), eta baita 2024ko Daytonako 24 Orduetako proban ere.

Gainera, Lewis Hamilton munduko txapeldunaren babesa du. Hamilton ekoizle gisa ageri da, Brad Pitt-ekin batera, eta aktiboki kolaboratu du proiektuaren egiazkotasuna ziurtatzeko, pilotuen arteko dinamikatik hasi eta paddock-aren xehetasun teknikoetaraino.