Lakuako Osasun Sailak udalei prebentzio neurriak indartzeko gomendioa luzatu die, azken asteetan Bizkaiko kostaldeko zenbait eremutan hegazti basatien artean atzemandako hegazti gripe kasuak direla eta. Agintariek nabarmendu dute, hala ere, «ez dagoela alarma soziala pizteko arrazoirik», baina komenigarria dela «prebentzioan sakontzea».

Osasun Sailak nabarmendu du birus hau uretako hegazti basatietan ohikoa dela mundu osoan eta, oro har, animalien artean zabaldu ohi dela, oso salbuespenetan soilik pertsonengan izan dezakeelarik eragina. Arriskua gutxienekoa dela azpimarratu dute adituek, baina prebentziorako eta lan segurtasunerako neurriak sendotu nahi dituzte, batez ere «garbiketako eta mantentze lanetan ari diren langileentzat».

Gomendatutako neurriak

Udalek gune publikoetan, batez ere hegazti basatiekin kontaktua egon daitekeen tokietan, garbiketa eta desinfekzio lanak areagotu behar dituzte. Horrez gain, zaborrontziak eta paperontziak hustu beharko dituzte antxetak edo bestelako hegazti basatiak pilatu ohi diren guneetan.

Bestalde, garbiketa lanak edo hegazti gaixo edo hilekin kontaktuan dauden langileek babes neurri indibidualak erabili beharko dituzte (eskularruak, maskarak…). Hegazti gaixo edo hilen aurkikuntza kasuan, foru aldundiek gaitutako telefonoetara deitu beharko da.

Lasaitasun mezua

Osasun Sailak adierazi du egoera kontrolpean dagoela, eta ez dagoela herritarrentzat alarma egoerarik; hartutako neurriak «prebentziorako eta babeserako» direla zehaztu dute. Gainera, berehalako berritasunen bat egotekotan, udalerriak eta, bereziki, kostaldekoak ohartaraziko dituzte, foru aldundiekin elkarlanean.