Canneseko Zinema Jaialditik eta Donostiako Zinemaldiko Perlak sailetik igaro ondoren, zinemetara iritsiko da Lynne Ramsay zinegile eskoziarraren lan berria: ‘Die My Love’. 

Grace (Jennifer Lawrence) eta Jackson (Robert Pattinson) ez dira hiriko zarata eta presarekin bat datorren bikotea. Bizitza lasaiago baten bila, hiriburua utzi eta landa eremuko etxe batera joango dira bizitzera. Haur bat izateko asmoa dute, eta ingurune baketsuan hezi nahi dute. Jacksonek etxetik kanpo egiten du lan, eta egun gehienetan luzaroan egoten da kanpoan; Graceki etxea eta inguruko errutina bere gain hartu beharko ditu. Umea jaiotzen denean, Grace –eta filma bera– zeharo aldatuko dira. Grace idazlea da, eta bere jarduna haurraren zaintzarekin eta etxeko egunerokoarekin uztartu beharko du. 

‘Die My Love’ maitasunean eta eromenean murgilduta dagoen emakume baten erretratua da. Lynne Ramsay zuzendariak aipatu du filmaren helburua edo mezua: «Drama txikiak, traumak eta erresistentzia egunerokotasunean arakatzea. Ustekabeko gertaera. Norberaren galera. Paralisia. Gracen aurkitu nuen hori guztia. Eta nola maite duen Jacksonek, ulertzeko gai ez den arren».

Lynne Ramsay

Bere filmografiak ‘Ratcatcher’ (1999), ‘Morvern Callar’ (2002) eta ‘We Need to Talk About Kevin’ (2011) bezalako film txalotuak biltzen ditu. Ikuspegi zinematografiko bereizgarria eta boteretsua erabiltzen du eta giza konplexutasuna atzemateko duen gaitasunagatik nazioarteko laudorio ugari jaso ditu. Irudien indarra, elkarrizketaren ekonomia eta ikuslearen oroimenean irauten duten atmosfera bizien eraikuntza dira bere zinemaren ezaugarri nagusiak.