Gutxienez 25 pertsona hil eta 90 baino gehiago zauritu dira asteazken honetan, Errusiak egindako aire eraso hilgarrienetako batean, Ukrainako mendebaldean.

Helburu nagusia herrialdeko mendebaldeko eskualdeak izan dira, frontetik urrunen daudenak: Lviv, Ivano-Frankivsk eta Ternopil, non Moskuk Ukrainako energia azpiegiturak kaltetu nahi dituen.

Ternopilen aurkako erasoa izan da hilgarriena: 25 hildako, tartean hiru haur, eta 92 zauritu, erreskate taldeek egindako behin-behineko balantzearen arabera. Oraindik ere hondakinen artean lanean jarraitzen dute bizirik irtendako herritarren bila.

Bi apartamentu eraikinetan goiko solairuak erabat suntsituta zeuden atzo, eta kea ateratzen zen apartamentuen hondakinetatik. Bien bitartean, suhiltzaileak inguruan lanean ari ziren suteak itzaltzeko.

Armadak adierazi duenez, 476 dronek eta 48 misilek kolpatu zuten herrialdea gauean zehar, eta, hurrenez hurren, 442 eta 41 bota zituen. Ternopili hamar gurutzaldi-misilekin egin ziotela eraso gaineratu zuen.

«Bonbardaketek bizitegi-eraikinak, industria-instalazioak eta biltegiak kaltetu dituzte, tamaina handiko suteak sortuz», adierazi zuen Barne Ministerioak.

Ternopil eskualdeko administrazioak herritarrei eskatu die beren etxeetan geratzeko eta leihoak itxita edukitzeko, aireko kloro-mailak ohikoak baino sei aldiz handiagoak baitira suteen eta ke trinkoaren ondorioz.

AEBko mandataria ez da joan Zelenskirekin Ankaran zuen hitzordura

Volidmir Zelenski Ukrainako presidenteak adierazi du eraso horiek agerian uzten dutela «Errusiaren gaineko presioa» ez dela «nahikoa». «Horrela ikusten dira benetan Errusiaren 'bake planak'», esan zuen ironiaz Andri Sibiga Ukrainako Atzerri ministroak, erreferentzia eginez hedabide estatubatuarren arabera Moskuk Washingtonekin hitzartu duen plan sekretuari.

Zelenski Ankaran bildu da bere homologo turkiarrarekin, Recep Tayyip Erdoganekin, eta bake elkarrizketei berriro ekiteko borondatea agertu du. Ankaran AEB prozesura «itzultzea» espero bazuen ere, Steve Witkoff ordezkari estatubatuarra ez da hitzordura agertu.

AEBren eta Errusiaren artean egindako plana

Aitzitik, AEBk Errusiarekin adostutako 28 puntuko plan bat bidali du Kievera, gerrari amaiera emateko.

Besteak beste, Kievi exijitzen dio Krimearen eta gaur egun Errusiaren kontrolpean dauden beste lurralde batzuen lagapena formalizatzea, eta Armada 400.000 soldadura murriztea, egungo erdia baino gutxiago, AFP agentziari gaiaren gertuko goi funtzionario batek egindako adierazpenen arabera.

«Plan hau onartu behar dugula adierazten duten seinaleak jasotzen ari gara», adierazi du iturriak, anonimotasun baldintzapean.

Kremlinek, bere aldetik, uko egin dio Axios hedabide estatubatuarrak argitaratutako informazioei buruzko iruzkinak egiteari. Informazio horien arabera, Washington eta Mosku zuhurtasunez ari dira plana prestatzen.

Planak Europarako segurtasun bermeak eta Washingtonek Moskurekin eta Kievekin izango duen etorkizuneko harremana ere jorratzen ditu, hedabidearen arabera.

Planaren garapenean ez dute parte hartu ez Ukrainak ez Europako bere kideek, eta Donald Trump presidenteak Errusiarako eta Ekialde Ertainerako duen ordezkari berezi Steve Witkoffek negoziatu du Kremlineko mandatari Kiril Dmitrievekin.

Ordezkari estatubatuarra Rustem Umerov Ukrainako Segurtasun Nazionalerako Kontseiluko buruarekin bildu zen aste honetan Miamin. Aurten bertan Kievek errusiarrekin izandako zuzeneko harremanetan parte hartu zuen ordezkaritzaren buru ere izan zen Umerov.

Presoen trukea berraktibatu

Erdoganek eta Zelenskik adierazi dute harreman gehiago izatea nahi dutela, akordio berriak lortzeko, Moskuko eta Kieveko ordezkariek Istanbulen egindako bileretan lortutakoen antzekoak, milaka gerra preso ukrainar eta errusiar askatzea ahalbidetu zutenak.

«Uste dugu Istanbulgo prozesua formatu zorrotz eta trinkoago batean berraktibatu behar dela», adierazi du Erdoganek.

Ukrainako presidenteak esan du espero duela presoen trukeak urtea amaitu baino lehen berraktibatzea.

Donald Trump Moskurekiko bitartekari gisa aurkeztu da gatazka honetan, nahiz eta Washington laguntza militar eta finantzario garrantzitsua izan den Kieventzat azken lau urteetan.

Hala ere, egin dituen ahaleginek ez dute lortu borrokak etetea. Zelenski eta Vladimir Putinekiko frustrazioa adierazi izan du, baina, azkenean, Errusiako petrolio sektorearen aurkako zigorrak hartu zituen urrian.

Errusiak eskatzen du Ukrainak bost eskualderen lagapena egitea eta NATOko kide izateari uko egitea. Kievek eskaerok baztertu eta oraindik kontrolatzen duen lurraldean Mendebaldeko tropak hedatzea nahi du, Errusiak onartezintzat jotzen duena.

Errusiaren aurrerapenak

Aurten Istanbulen errusiarren eta ukrainarren artean egindako elkarrizketa txandek ez dute aurrerapen esanguratsurik lortu, eta, orain, neguaren atarian, Ukraina oso egoera zailean dago.

Azken asteetan, errusiarrek frontean egindako aurrerapen geldoa azkartzen hasi da, eta Pokrovsk, ekialdeko frontean giltzarri den hiria, tropa errusiarren esku geratzeko zorian dago. Errusiarrek zenbait egun daramatzate hegoaldeko Zaporizhia eskualdean ere aurrera egiten, frontea bertan ia bi urtez guztiz izoztuta egon ondoren.