Gasteizko Udalak astelehen honetan hasiko ditu bizikleta bide berriaren eraikuntza lanak hiriko erdigunean kokatzen den Gasteiz etorbidean. Proiektuak 295.419 euroko aurrekontua du eta zazpi hilabeteko epea aurreikusten da.

Lanak pixkanaka eta linealki egingo dira etorbide osoan, proiektuaren beharren arabera aurrera eginez, bide osoa moztu gabe.

Lehen fasean, Diaz de Olano margolaria eta Adriano VI.a kaleen gurutzebidean dauden oinezkoentzako aterpeak berrituko dituzte. Tuvisa eta Alavabusen zerbitzuak normaltasunez mantentzea espero dute, autobus geltokiak berdinak izaten jarraituko baitute, nahiz eta erreien zati bat ixtea posible den.

«Gogoz espero den proiektua da, herritarren proposamenetatik zuzenean sortua, hiriko kale nagusietako batean mugikortasun seguruago eta antolatuago baterantz aurrera egiten jarraitzeko aukera ematen diguna», adierazi du Beatriz Artolazabal Espazio Publiko eta Auzoetako zinegotziak.

Mugikortasunean eragin handiena duen fasea geroago etorriko da, Diaz de Olano eta Adriano VI.aren bidegurutzeetako espaloiak berritzearekin batera. Orduan beharrezkoa izango da autobus geltoki batzuk aldi baterako ixtea eta inguruan behin-behineko batzuk jartzea.

Aparkalekuak ere kendu beharko dira, kasu batzuetan aldi baterako eta beste batzuetan behin betiko.

Aldi baterako etenaldiez aparte, proiektuak Gazteiz etorbideko espazio publikoaren eta mugikortasunaren hobekuntza dakar. Izan ere, Tuvisa eta Alavabusen geltokiak argi bereiziko dira euren zerbitzuak hobetuz. Gainera, irisgarritasuna hobetuko da geltoki garrantzitsuetan.

Beste aldaketa bat espazioaren berrantolaketa izango da. Oinezkoentzako guneak zabalduko dira, eta hobekuntzak egingo dira oinezkoek eta txirrindulariek errepidea partekatzen duten gune gatazkatsuetan.