Ekimen honen sustatzaileetako bat Munduko Landagunea da, EAJak nazioarteko nekazaritzan bere presentzia bermatzeko sortutako erakundea da hau. Azken egunetan Munduko Landagunea izendapen hau batean eta bestean zabaldu nahian dabil, ahalik eta babes gehien jaso eta ahalik eta oihartzun gehien eman nahian.

Mundu mailako irakurketak eta aldarrikapenak erosoak izaten dira sarritan, zehaztasun gutxikoak diren heinean, baina benetako zailtasunak gertura begiratzen hasitakoan aurkitzen dira. Araba, Bizkaia eta Gipuzkoara begiratzen badugu argi ikusten da EAJak azken 30 urteetan bultzatu dituen nekazaritza politikak agroindustriari zuzendutakoak izan direla. Baserritar eta herritarren arteko harremanak apurtu eta urrundu dituela nahita, horretarako diru laguntzak eta legeak erabilita. Baserritarren jarduna aktibitate batetara espezializatu eta intentsifikatu du baserritarra agroindustria, multinazional, banatzaile eta espekulatzaileen eskuetan salduta utziz. Makina bat datu eta adibide aurki genitzake baina bakarrari egingo diot aipamena, azkenaldian geroz eta ozenago entzuten den ikastetxeetako jantokietan bertako produktuak bertan prestatuta bideratzeari Jaurlaritzak jarri zion debekuari. Den dena goitik behera catering enpresen eskuetan utzia du, agronegozioaren alde, galtzaile nagusiak baserritar, arrantzale eta herritarrak bihurtuz.

Bestetik harrituta geratu naiz 2014 Famili Nekazaritzaren nazioarteko urtearen webgunean babesle bezala Kaiku korporazioa aurkitu dudanean. Korporazio hau multinazional bat da, hona hemen hori baieztatzeko zenbait datu jarraian. 2011 urtean 278 milioi euroko fakturazioa izan zuen, instalazioak ditu Espainia eta Frantziako estatuetan, Tunisia eta Txilen, eta mundu osora esportatzen ditu produktuak. Korporazioaren jabetzaren %66a Emmi multinazionalaren eskuetan dago 2012an Jaurlaritzak eta Caja Rural de Navarrak beraien akzioak saldu ostean. Eta Emmi oraindik ere erraldoiagoa da, 3.000 milioi euro fakturatu zituen 2012an eta 5.000 langile ditu.

Zer da beraz Famili Nekazaritza? Ez dadila behintzat 2014a Famili Nekazaritzaren nazioarteko urtearen aitzakiarekin edozeinek bere etxearen aurpegia garbitu eta zuritzeko izan.