Azaroaren 3an (asteartea), 17.00etan, Iruñeko Udaletxeko plazan elkarretaratuko gara Euskaltzaleen Foroko kideak Iruñean euskaldunok jasaten dugun egoera salatzeko. Izan ere... 

Iruñeko Udaleko 2026ko plantilla organikoan, hauxe da lanpostu elebidunen kopurua: %4,83, haur eskolak kontuan hartu gabe. Horrek ezinezko bihurtzen du euskaldunoi euskarazko arreta bermatzea, eta Iruñean 25.000 euskaldun baino gehiago bizi gara, eta beste hainbeste euskaldun «hartzaile» (euskaraz mintzatu ez baina ulertzen dutenak). Gainera Nafarroa osoko euskaldunak ere sarri etortzen dira hiri buruzagira, Nafar gobernuaren hainbat ordezkaritzetara, besteak beste. 

Iruñeko udalean euskara, oro har, ez da merezimendu gisa ere puntuatzen. 

Salbuespen bakarrak: 

Udaltzainen lau lan deialditan euskara puntuatu zen, Polizien Legeak hala behartzen zuelako; baina oso miserableki: Behin, puntuazio guztiaren %0,5, beste bitan, %1, eta beste behin %1,65. 

Azkeneko sanferminetarako, Babes Zibileko laguntzaileen zerrendak egin ziren, zortzi egunerako lana zen. eta euskara %10,71 punturekin baloratu zen. Bestalde, xede bereko beste zerrenda batean nahitaezkoa zen ingelesa jakitea... 

Legealdi honetan 76 lan deialditan euskara ez du puntuatu Iruñeko Udalak. 

(Lekualdatze-lehiaketetan bai, puntuatzen du, baina hori da langileak toki batetik bestera eramatea, besterik ez. Udala ez da horrela euskalduntzen). 

Iruñeko Udala administrazio elebiduna bihurtzeko bidea zeharo blokeatuta dago, beraz. 

Horrenbestez, hauxe eskatzen diogu Iruñeko Udalari: 

1. Profil elebiduneko lanpostu kopurua handitzeko, eta gainerako lanpostuen lan deialdietan euskara baloratzeko. 

2. Bestalde, Nafarroa Garaiko udal inportanteena den aldetik, Merezimenduen Dekretua publikoki salatzeko, oso larriki mugatzen baitu udalen ahalmena euskara baloratzeko.

Zuen iritzi artikulu edo gutuna iritzia@gara.net helbidera bidal dezakezue, word formatuan edo beste formatu editagarri batean. Idatzian sinatzailearen izena, abizenak, telefonoa eta NAN zenbakia agertu behar dira. Iritzi artikuluak eta gutunak sinatzailearen izen-abizenekin argitaratuko dira. Egileak talde baten izenean sinatzen badu, sinatzailearen izenaren azpian taldearen izena agertuko da. NAIZ ez da iritzia sailean argitaratutako edukiez arduratzen.