Aurtengo udaberrian iragarri bezala, Euskal Herriak erabakitzeko eskubidea duela aitortzetik hautestontziak atera eta eskubide hori gauzatzera pasatuko dira Oiartzualdeko herriak. Guztira ehun herri inguruk eginen dute urrats bera heldu den martxoaren 19an, Gure Esku Dagoren deiari erantzunez.

Gaur ekitaldi xume batean azaldu ditu Naroa Iturri aurkezleak bide horretan Demoarsok, «komunitate sentituz eta komunitate gisa jokatuz», ezarri nahi dituen lau mugarriak. Lehena, azaroaren 6koa, «sekulako erronka» izanen da, Pasaiako badia inguratuko baitute erabakitzearen alde. 8.500 metro izanen dira, 10.000 lagun, 85 zati arduradun eta gonbidatu ezagunekin. Baina benetan nahi dutena kate infinitua osatzea da, eskualdea bezalakoa, alaia eta anitza. Data sinboliko batean, gainera: 1933an Autonomia Estatutuari buruzko galdeketan Oiartzualdeko emakumeek bozkatzeko eskubidea gauzatu zuten lehen alditik 83 urte betetzen diren egunean.

Ondotik, azaro bukaeran, galderak definitzeko prozesu parte-hartzaileak abiatuko dituzte herriz herri, eta boluntarioak lortu eta aktibatuko dituzte, bozkalekuak zehaztu, galdeketak egiteko lantaldeak sortu... Hurrengo urratsa urtarrilean aurrekanpaina hastea izanen da, etxez etxe martxoaren 19rako deialdia zabaltzea eta atxikimenduak lortzea.

Azkenik, otsaila erabakira eramanen dituen kanpaina herritarraren hilabetea izanen da.

Beira taldeak abeslari eta sortzaile ezagunekin batera Demoarso dinamikarentzat sortu duen abestiaren aurrerapen bideoa erakutsiz bukatu da ekitaldiaren lehendabiziko zatia. Bigarrenean, mahai-ingurua egin dute, Xabier Oleaga gidari zela, Imanol Esnaola Demoarsoko kideak, Mario Zubiaga EHUko irakasleak eta Zelai Nikolas legelariak, erabakitze eskubidean sakondu eta Gure Esku Dago mugimendua jende gehiagorengana zabaltzeko asmoz.