Arazo bat Ziburun, arazo Euskal Herrian
2014/09/01

Paueko Administrazio Auzitegiak Ziburuko Kaskarotenia ikastolari astebeteko epea eman dio egun erabiltzen duen eraikina utz dezan. Horrez gain, epe horretatik aurrera, bertan jarraitzen duen egun bakoitzeko ehun euroko isuna jarriko diola mehatxu egin dio. Mahai gainean zituen hiru aukeren artean, epaileak ikastolari eta bertan ikasten duten haurrei kalte handiena eragiten diena hartu du, eta ataka larrian jarri ditu bai ikastola bera bai haurrak. Izan ere, Seaskako zuzendari Hur Gorostiagak iragan ostiralean nabarmendu zuenez, Marinelako guneaz aparte ez dute klaseak hasteko bestelako lekurik. Eta gaur hasiko da ikasturtea...
Argi dago, beraz, arazo bat dutela Ziburun. Eta ez bakarrik ikastolan izena emanda dauden hamabi haurrek edo haien gurasoek, baizik eta euskarak, euskal hezkuntzak eta euskal kulturak pixkanaka bada ere bere lekua har dezan lanean ari diren herritar guztiek. Are gehiago, gertatutakoa arazotzat jo beharko lukete euskal hizkuntzari errespetua dioten guztiek. Eta Ziburun arazo bat dute, batez ere bertako Herriko Etxeak arazo bilakatu nahi izan duelako, eta euskararekiko zein haurren hezkuntza eskubideekiko sekulako axolagabetasuna erakutsi duelako. Herri hauteskundeak izan eta hain denbora gutxian auzapezak horrelako jarrera oldarkorra agertzea berri txarra da, zinez, ziburutarrentzat.
Baina Ziburun arazo bat duten bezala, arazoa, letra larriz idatzita, Euskal Herriak dauka, berriro ere instituzio arrotz batek zuzenean eragiten dion gai batean bere kalterako den erabakia hartu duelako eta betearaziko duelako. Kasu honetan Paueko Auzitegia izan da –euskaldunoi kalte egiten esperientzia luzea dauka auzitegi horrek–, baina beste batzuetan beste epaitegi, administrazio, gobernu ordezkari edo polizia batzuek izaten dira gure herriari buruz erabakitzen dutenak, Ipar Euskal Herrian zein Hego Euskal Herrian. Eta hori aldatu ezean, euskal herritarron eskubideek esku arrotzen menpe jarraitzen duten bitartean, arazoak bere horretan jarraituko du. Ziburun eta Euskal Herri osoan.