Bai, zuk hezkuntza baztertzailea eta segregatzailea ezarri nahi duzu. Guk aukera berdintasunean oinarrituriko hezkuntza inklusiboa sustatu nahi dugu. Zuk hezkuntza pribatua eta katolikoa bultzatzen duzu. Guk kalitatezko hezkuntza herrikoi, publiko, berria eta laikoa dugu oinarri. Zuk ikasle espainol homogeneoak nahi dituzu. Guk ikasle euskaldun eleanitzak sortu nahi ditugu. Zuk balore antzuetan adoktrinaturiko ikasleak produzitu nahi dituzu. Guk errespetuan, berdintasunean, kulturartekotasunean eta elkartasunean hezitako etorkizuneko pertsonengan amesten dugu. Zuk parte-hartzerik gabeko eskola komunitateak nahi dituzu. Guk hezkuntza komunitate eta gizarte osoaren parte-hartzeaz eraikiko ditugu gure ikastetxeak. Guk auzora, herrira, Euskal Herrira eta mundura irekita dauden ikastetxeak maite ditugu.

Erro zaharrak dituen herria gara. Bestelako gizarte batean sinisten dugun milaka lagun gara. Azken 50 urteetan euskararen alde, euskalduntzearen alde, euskal curriculumaren alde, amesten eta lanean aritu garen guztiak gara. Ikastolen sorrera posible egin zenuten guztiok gara. Ikastoletatik gizarte osora hezkuntza euskalduna hedatu zenutenok gara. Zuen seme-alabentzako hezkuntza euskaldunaren aldeko apustua egin duzuen guztiok gara. Eta, guztion eskuetan dago urteetan lorturiko altxorra amets eta erronka berriez aberastea. Zuek eta guk, guztiok elkarlanean arituz bakarrik lor dezakegulako. Gure hezkuntza sistema eraikitzen jarraitzeko unea da.

Hau guztiagatik, gainean dugun eraso larri honen aurrean, eraikitzen ari garen hezkuntzan sinisten dugulako, guztiok elkarrekin, ilusioz, lanerako grinaz, eta beldurrik gabe ezetza emango diogu Lomceri edota inposaturiko edozein legeri.

Amets honi eutsiz, jadanik euskal gizartea hasia da antolatzen. Ez dira gutxi ez, hilabete hauetan Lomceren kontra eta gure hezkuntza eraikitzearen alde eratutako plataformak. Ez dira gutxi ez, hilabete hauetan plataformetatik abian jarritako ekimenak. Herriz herri, ikastetxez ikastetxe hitzaldiak emanez, lege atzerakoi honen ondorioak plazaratuz, iritziak jasoz, beldurrak konpartituz, eta aurre egiteko proposamen zehatzak eskainiz. Ez dira gutxi ez, komunikabideetan eskainitako elkarrizketak, kalejira eta giza-kate koloretsuak, flashmob alaitsuak... hamaika modutan aldarrikatu du euskal gizarteak ez duela Lomcerik nahi. Ez dira gutxi ez, ikastetxeek, era bateratuan, adostutako dinamikak. Ez dira gutxi ez, lanerako adierazitako nahiak eta gogoak.

Lanerako gogo eta ilusio horietatik, azken ikasturtean lau herrialdeetako plataforma bakan batzuk elkartu ginen eta Hezkuntza Plataforma Topagunea osatu genuen. Ordutik asko izan zarete batu zaretenok. Martxoaren 4an jaiotako proiektu xumea, hezten eta hazten ari da. Elkarrekin eta elkarlanean hezten eta hazten ari gara eta gure konpromisoak gero eta haratago iristen ari dira. Aldarrikapenetatik konpromisoetara salto egin dugu. Konpromiso pertsonaletatik abiaturik, modu kolektiboan konpromisoak hartzeko eta legearen ez-aplikazioaren ibilbidea garatzen hasi gara. Txikitik handira doan dinamika da. Norbanakoen konpromiso eta sinadurez Lomcerik gabeko gelak eta ikastetxeak lortzen goaz. Herritarrek zuen sinadurekin eman diguzuen babesarekin, Lomceri aurre egitea, udaleko konpromiso bilakatu nahi dugu. Hezkuntza guztion altxorra eta ardura denez, guztiok parte izan behar dugulako, ikastetxeetatik herrira jo dugu, gure herriak, Lomcerik Gabeko Herriak izatea nahi dugulako.

Baina ekimenez eta lorpenez beteriko azken ikasturte luzea, zapore gazi-gozoaz amaitu genuen. Ikastetxeak isiltasunez estali direnean eta gure herriko plazak, hondartzak eta mendiak umeen irribarrez bete direnean, Hezkuntza Sailak, aho txikiz, mezu argi bat luzatu zigun: 2014-2015 ikasturtean Madrildik aginduriko Lomce legea aplikatuko duela baieztatu zigun. Ikastetxeak hutsik egon diren hilabete hauetan, Plataformek lanean jarraitu dugu eta Lomceren kontrako aldarrikapena Euskal Herriko ikastetxe, plaza, herri eta auzo guztietara hedatzera goaz. Etorkizuna gaurdanik defendatu behar dugulako, 30 urte atzera baino, aurrera egiteko momentua delako. Gure Hezkuntza eraikitzen jarraituko dugu. Kalitatezko hezkuntza sistema nahi dugu eta onartezina den legea, aho batez aplikatzeko ezintasun kolektiboa dugu. Herriz herri, erritmo eta abiapuntu ezberdinak kontuan izanik, eta konpromiso pertsonal eta kolektiboetatik abiaturik legearen ez-aplikaziorako ekintza zuzen, zehatz eta zuhurrak aurrera eramango ditugu. Norbanakotik kolektibora, txikitasunetik handitasunera.

Hau hasiera besterik ez da izan, datorren udazkenean Lomceren kontrako txertorik eraginkorrena, guztion parte hartzea izango da. Zuen seme-alaben irakasleekin, auzokideekin, lankideekin... elkartu eta eratu itzazue plataformak Euskal Herriko bazter guztietan. Bihurtu itzazue zuen ikastetxeak Lomcerik Gabeko Ikastetxeak eta zuen herriak Lomcerik Gabeko Herriak, guztion artean Lomcerik Gabeko Euskal Herria lortu arte. Eta guztion artean gure hezkuntza eraikitzen jarraituko dugu.

Ameslariak gara, Lomcerik Gabeko Euskal Herrian amesten dugu. Gure hezkuntza sistema eraikiko dugula amesten dugu. Euskal Herria eraikitzen dugula amesten dugu. Gurekin batera amestu nahi duzu? Ameslaria izan nahi duzu? Ametsetatik errealitatera! Aukera paregabea duzu! Ametsak egia bihur ditzagun!