Tubos Reunidoseko Amurrioko fabrikan atzo egin zuten bileran, greba bertan behera uztearen alde bozkatu zuten parte hartu zuten langile gehienek, bertako langile guztien laurdenak baino ez badira ere. Tentsio handia izan zen; hala ere, ez zen istilurik gertatu. Tentsio hori langile batzordean dagoen berbera da; izan ere, batzordearen gehiengoak, ELA, LAB eta ESK-k ordezkatuak, bileran parte ez hartzea erabaki zuen. Nolanahi ere, bozketa hori langileen arteko zatiketaren erakusgarri izan zen, eta Amurrioko lantegian ez ezik, enpresa osoan ere nabarmena da. Aiaraldeko fabrikan, iragarritako kaleratzeak galarazteko erantzun irmoaren aldekoak dira langile gehienak; Trapagarangoan, berriz, enpresarekiko akordioaren aldeko gehiengoa dago, enplegu erregulazioko kaleratze gehien-gehienak Amurrioko lantegian aurreikusita daude eta.

Langileen arteko desadostasunak, gainera, areagotu egin dira enpresaren jarrera setatiaren ondorioz. Astelehenean hartzekodunen konkurtsoan sartu zen, beste aukerarik ez zuela ziurtatuta. Langile batzordeak salatu duenez, baina, zuzendaritzak ez die argi hitz egin nahi eta informazioa ezkutatzen die. Beste alde batetik, Lakuako Gobernuaren jokaera ere ez dirudi egokiena denik. Joan den martxoan Industria sailburu Mikel Jauregik, inbertsioak erakartzen saiatzeko eskatu ziotenak, adierazpen polemikoak egin zituen, «ea nor ausartzen den» esanez, eta aste honetan bertan berak eta Arabako ahaldun nagusiak greba bertan behera uzteko eskatu diete langileei, enpresak bezala. «Denek batera arraun egin beharra» aldarrikatu baina enpresaren irizpidearekin bat egiten dute. Testuinguru horretan egin zen atzoko bilera.

Batzordearen gehiengoak argi utzi zuen atzoko bilerako erabakiak ez dituela gainerako langileak lotesten eta, horrenbestez, dagoeneko bi hilabetera iritsi den grebak bere horretan jarraituko duela. Enpresak eskaintzen duen irtenbide bakarra enpleguak suntsitzea da, eta, zenbait urtez zorra gutxitu eta etekinak izan ondoren, ez da onargarria azkenaldiko kudeaketa txarrak nahiz mundu mailako gorabeherek eragindako emaitza kaskarra langileei ordainaraztea.