Ainhoa Baglieto eta Amaia Izko abokatuek astelehen honetan Giza Eskubideen Europako Auzitegian jarri zuten errekurtsoaren berri emateko prentsaurrekoa eman dute Iruñean.

Abokatuen ustez, Estrasburgok agindutakoari «entzungor» egiten diete Estatu espainiarreko gobernu eta epaitegiek Ines del Rioren kasuan eta hori izan da GEEAn 20 errekurtsoak sartzeko arrazoietako bat .

«2006a baino lehenago kondenatua izan den inori ezin zaio doktrina hau aplikatu», utzi dute argi prentsaurrean eta Estatu espainiarrari gogorarazi diote Del Rioren sententziak hari sortutako kalteak bere «berehalako askatasunarekin» errepara ditzala eskatu zitzaiola.

Abokatuen esanetan, «zuzenbideko estatu batean giza eskubideak oinarrizko printzipio direla jakinda», onartezina egiten zaie Estatu espainiarrak eta epaitegiek duten jarrera.

‘Parot doktrinaren’ pean 60 preso politiko daudela gogorarazi dute abokatuek, «euren eskubide bortxarekin bukatzeko jo dugu europara».

Gauzak horrela, 197/2006 doktrinarekin amaitzeko sinadura bilketa bat abiarazi dutela aurerratu dute eta dagoeneko zuzenbide alorreko 200 profesional baino gehiagoren sinadurak bildu dituztela argitu dute.

‘Parot doktrina’ ezabatu bitartean sinadurak biltzen jarraitzeko konpromisoa erakutsi dute.