2031n amaituta egon behar duten Louvre zaharberritzeko lanak «bultzada arkitektural eta kultural berria» ekarriko du, Rachida Dati ministroaren esanetan. Mundu osoko arkitekto garrantzitsuek parte hartuko dutela aurreikusten da.

700 eta 800 milioi euro artean zenbatu da obren kostua, nahiz eta iturri sindikalek 1.000 milioira igo duten. Proiektuaren asmoa da munduko museorik bisitatuena hondatzeari erantzutea. Baina baita egokitu ere, azken urteetan erregistratu den bisitari-eskari gero eta handiagoari begira.

Sarrera nagusia, 1988an Ieoh Ming Pei txinatarrak egindako kristalezko piramidearen azpian, urtean lau milioi turista hartzeko pentsatuta zegoen, baina azkenaldiotan kopurua bikoiztu baino gehiago egin da.

Hori dela eta, proiektu berriak museoaren ekialdeko hegalean sarrera berri bat sortzea aurreikusten du, urtean 12 milioi bisitari hartzeko.

Areto bat ‘La Gioconda’ obrarentzat

«Munduko museoen arkitektura-lehiaketarik handiena da», adierazi du ministroak, zeinak azpimarratu duen obrak ez diola ia dirurik kostatuko altxor publikoari. Izan ere, museoaren beraren funtsekin autofinantzatzea da asmoa, eta, horretarako, tarifa-politika berri bat diseinatu da: Europar Batasunetik kanpoko turistentzat garestiagoa izango da, 30 euro artekoa, eta horri mezenas batzuen ekarpenak gehituko zaizkio.

Sarrera berriarekin batera, Macronek iragarri du Leonardo da Vinciren ‘La Gioconda’ obra enblematikoa areto batean jartzea izango dela erreformaren nobedade nagusia. Gaur egun beste batzuekin batera dago, eta horrek zaildu egiten ditu egunero obra ikustera hurbiltzen diren 30.000 turisten bisitak.