Udazkeneko Mendi Tour irailaren 23an abiatuko da Bergaran eta Ermuan. Pol-Pol Mendi Taldearen ekimena da Bergarakoa. Iaz arrakastatsua izan zenez, aurten berriro Seminarixoan bilduko dira; Ermuakoa, berriz, lehen edizioa da, eta Artarrai mendi taldearen 50. urtemugako ospakizunen programan sartu da.

Urnietan zortzigarren edizioa egingo du Mendi Tour zikloak, Sarobe Arte Eszenikoen gunean, eta Madrilen, berriz, hamaikagarranea, Golem zinema aretoen eskutik eta RSEA Peñalara, Sputnik Climbing eta Ternua markek babestuta.

Era berean, dagoeneko hitzordu finkoak dira Kanariar Irletako Santa Brigida, Burgos, Getaria, Markina-Xemein, Sopela, Errenteria, Basauri, Oñati eta Potes. Elgoibar ere finkatuta dago jada, baina aurten berrikuntza bezala bigarren proiekzio eguna gehitu da. Tafallan eta Galdakaon, berriz, lehen edizioa beteko du Mendi Tour zikloak.

11.000 ikusle

Iazko abenduko Mendi Film jaialdian estreinatu edo parte hartu zuten 21 zinta ditu ziklo ibiltariak, tartean jaialdian sarituak izan ziren hainbat lan. Programazioak tokiko antolatzaileekin batera adosten dira, katalogo horretan oinarrituta.

BBK Mendi Film Bilbao Bizkaia nazioarteko Jaialdiaren antolatzaileek jakinarazi dutenez, urteko lehen seihilekoan 11.000 ikuslek gozatu dute Mendi Tour zikloaren eskaintzaz 32 egoitzatan.