NatureWatch Natura Behatzeko Turismoaren X. Topaketa egingo da martxoaren 25etik 27ra Gasteizen eta Arabako Izkiko Parke Naturalean. Jardunaldia bat etorriko da Arabako Foru Aldundiak martxoaren 28an eta 29an sustatuko duen Okil Ertainaren II. Jaialdiarekin. Bertan, erakundeen arteko lankidetza balioetsiko da, eta Arabako natura ondarea nabarmenduko da «Euskadiko natura turismoaren erabilera publikoaren erreferente gisa».

Arabako Aldundiak eta Eusko Jaurlaritzak Natura Ondarearen Zerbitzuaren eta Basquetour Turismoaren Euskal Agentziaren bidez antolatuta, Espainiako Estatuko adituak eta profesionalak bilduko ditu ekoturismoari buruz eztabaidatzeko eta sektorearentzat interes handikoak diren gaiak jorratzeko.

Hiru egunez (martxoaren 27tik 29ra), hitzaldiak, mahai inguruak eta landa jarduerak egingo dira Arabako enklabe natural ezagunetako batzuetan. Topaketaren egoitza nagusia Salburuko Hezeguneen Interpretazio Zentroa izango da, Gasteizen, eta, aretoko saioez gain, bisita gidatuak egingo dira hezeguneetara eta Izkiko Parke Naturalera.

Topaketaren ardatz tematikoa «naturaguneetan harrera egiteko gaitasuna eta esperientzia ekoturistikoen kalitatea» izango da, eta hainbat erronkari helduko zaie, hala nola parke babestuetako bisitarien kudeaketa, esperientzien kalitatearen hobekuntza eta finantzaketa aukerak Europako NextGenerationEU programaren ondoren.

Naturaren soinuak

Era berean, sare sozialek natura turismoan duten eraginari buruz eztabaidatuko da, sektoreko teknikariek, adituek eta eragin sortzaileek parte hartuko duten mahai inguru batean. Sarbideen kudeaketan eta ingurune naturalen babesean arrakasta izan duten kasuak aipatuko dira.

Topaketaren une nabarmenetako bat naturaren soinuak grabatzeko murgiltze tailerra izango da. Carlos de Hita espezialistak eskainiko du, eta Izkiko basoa «entzuteko» eta haren soinu aberastasuna ezagutzeko aukera emango du. Gainera, behaketa astronomikoko jarduerak eta baso hegaztiak begiztatzeko ibilbideak ere egingo dira, natura ingurunean dibulgazioa eta zuzeneko esperientzia uztartzen dituen programa baten barruan.