Tafallako Fagor Ederlaneko langile ohi bat hil da, lan urteetan amiantoa arnastearen ondorioz. Victorio Luzuriaga S.A. enpresa izan zen garai batean. ELA sindikatuak eman zuen heriotzaren berri eta zehaztu zuen 1977tik erretiroa hartu zuen arte amiantoaren eraginpean egin zuela lan gizonezkoak lantegi horretan, «inolako segurtasun neurririk hartu gabe». 

«Diagnostikatutako patologia, birikako kartzinoma ezkatatsua, amiantoaren eraginpean egotearekin zuzeneko lotura duen patologia da, eta hala aitortzen da indarrean dagoen lanbide-gaixotasunen koadroan», argitu zuen 2017an Nafarroako Osasun Publikoaren eta Lan Osasunaren Institutuak eginiko diagnostiko kliniko-laboralak. 

Gizarte Segurantzaren Institutu Nazionalak aitortua zion hildako langileari Laneko Gaixotasunaren ondoriozko Ezintasun Iraunkor Osoa, eta, hil zen unean oraindik egiteke zeuden prestazioen errekarguaren arloko ikuspegi judizialak —segurtasun-neurririk ez izateagatik pentsioaren %50eko errekargu-proposamenarekin— eta Erantzukizun Zibilekoak. Bere senideek jarraituko dute prozedura horiekin.

«Heriotza horrek, berriz ere, bere gordintasun osoan kokatzen gaitu, amiantoarekin kontaktuan egotearen ondorioz lanbide-gaixotasunen dramaren aurrean», deitoratu zuen ELAk. 

Ohartarazi zuenez, «fenomeno hori gero eta handiagoa da, eta dimentsio ia pandemikoa du; hori guztia kontrol publiko eskasaren ondorioz eta joan den XX. mendean enpresek segurtasun neurririk hartu ez izanaren ondorioz».

ELAk doluminak eta atsekabea helarazi zizkion hildakoaren familiari, eta, aldi berean, enpresei eskatu zien erantzukizunez joka dezatela eta «behingoz atzera egin dezatela bide judiziala beharrik gabe luzatze horretan». Sindikatuaren iritziz, bide judizialak «eragindako pertsonen sufrimendua areagotzeko eta berriro biktimizatzeko baino ez du balio».

Horrekin batera, erakunde publikoei eskatu zien «langile klasearen osasunerako eskubidea modu eraginkorrean bermatzeko behar beste baliabide eslei ditzatela», eta lantokietako produktu kantzerigenoak desagerrarazteko borroka egiteko konpromisoa berretsi du.

Pedro Orbegozo-Acenor

Tafallako Fagor Ederlan lantegian lan egiten zuen behargina oraindik ikuspegi judizialak ikusteke zeudela zendu zen, baina Pedro Orbegozo-Acenor enpresako langile ohi batek, aldiz −zeinak amiantoarekin lan egin ondoren biriketako minbizia duen−, 300.000 euro eskatu dizkie Cofivacasari eta Sidenorri kalte-galeren ordainetan (Pedro Orgegozo-Acenor enpresaren ondorengo gisa). 

1964 eta 2000 bitartean laminatzaile eta taldeburu gisa lan egin zuen hagun-trenean. Lehendabizi Hernaniko faktorian aritu zen eta, ondoren, Basaurikoan. 2019an antzeman zioten biriketako minbizia eta amiantoaren eraginpean egondako langileen zerrendan sartu zuen Osalanek. 

Lehen bista astelehenean egingo da Donostiako Justizia Jauregian eta Asviamiek elkarretaratzea egingo duela esan du.