Donostiako Bretxa merkatuaren ondoan dagoen Gorriti tabernara sartu den edonork zailtasun itzelak ditu barraren gainean kokatuak dauden pintxo ugarien artean bakar bat aukeratzeko. Horregatik, Josetxo Perez arduradunari aukeran dituen mini ogitartekoen artean bat aukeratzeko eskatu eta hark tortilla frantsesa esandakoan harritu egiten da bat. Betiko-betiko bezeroak ez. Izan ere, asko dira goizean bertaratu eta tortilla frantsesa eskatzen dutenak. «Harritu egingo zaitu, agian, baina badira urteko egun guztietan etortzen direnak, hain justu, ogitartekotxo hori jatera», azaldu du.

Tortilla egiteko erabiltzen dituzten arrautzen kalitatea eta haiek ondo irabiatzean dago sekretua. «Olioak ere tenperatura zehatzean egon behar du, bero», zehaztu du. Modu honetan lortzen dute Gorriti tabernan tortilla frantsesa harroa egitea. Ogitartekotxoa osatzeko, urdaiazpiko iberiko xerra bat jartzen diote gainetik, «sinplea baina ona». Piper berdea jarri izan diotela ere esan du, baina gehienek nahiago dute urdaiazpikoa.

Orokorrean, pintxo tradizionalen aldeko apustua egiten dutela aitortu du Perezek, «agian, gurean bezeroak ez ditu topatuko pintxo moderno edo berritzaileak, mimoz egindako ohiko modakutxoak baizik», azaldu du. «Asko saltzen dugun bestea bakailao tortillarena da; kasu horretan ere produktuaren kalitatea eta egiteko orduan jartzen dugun mimoa dira osagai nagusiak», zehaztu du. Hura egiteko tipula eta piperra mantso-mantso erregosten dituztela azaldu du berriz eta behin xehe-xehe dagoenean, botatzen dutela bakailaoa, perrexila eta irabiatutako arraultzak.