Añanako Gatz Haranak bi milioi euro jasoko ditu Next Generation funtsetatik, ingurunea eta herriarekiko konexioa hobetzeko eta modernizazioa eta digitalizazioa sustatzeko egingo den proiektu batera bideratuta.

Javier Hurtado Lakuako Gobernuko Turismo, Merkataritza eta Kontsumoko sailburuak eta Juan Carlos Medina Añanako alkateak proiektuan egindako aurrerapenak aurkeztu dituzte aste honetan. Gobernu espainolaren Berreskuratze Planaren barruan, EAEko Turismo Jasangarritasuneko Lurralde Planaren lehen deialdian sartuta dauden hamaika helmugetako bat da Añana.

Hurtadok azpimarratu duenez, Lakuak baliabide turistikoak balioesten jarraitzeko apustua egin du. Hain ezagunak edo hiriburuetakoak ez diren tokiak suspertzea da helburua, Araba, Bizkai eta Gipuzkoako turismo-eskaintzaren aniztasuna ezagutzeko aukera gisa.

«Ekainean falta ziren azken datuekin egiazta dezakegunez, lehen sei hilabetetan turismoak %4,2ko igoera izan du 2019ko lehen sei hilabeteekin alderatuta. Gainera, oso garrantzitsua izan da nazioarteko turismoaren igoera (%3,9koa), pandemiak gehien kaltetu duena izan baita. Eta, zehazkiago, Arabako datuak 2019koekin parekatu dira, eta igoera txiki bat izan da ostatu-gauetan», azaldu du.

«Gorriak ikusi ditu»

Sailburuak aipatu duenez, «turismo-sektoreak gorriak ikusi ditu, baina udarako genituen aurreikuspenak oso datu onekin berresten ari dira. Añanako proiektua eta antzeko ekintzak lagungarriak izango dira, zalantzarik gabe, turismoa turismo-jasangarritasuneko estrategia baten aldeko apustuaren barruan bultzatzen jarraitzeko».

Añanako Gatz Haranerako proiektuan, honako turismo-ekimen hauek egingo dira: tokiaren inguruko ibilbideak egokitzea, ibilgarritasuna eta hiri-konexioa hobetzea, udalerriko harresiak baliabide turistiko gisa sustatzea eta errealitate birtualeko esperientziak edo entzute aktiboko plataforma bat garatzea, besteak beste.

Euskadiko Turismo Jasangarritasuneko Plana hiru deialditan gauzatuko da 2023ra arte, eta 67 milioi inbertituko dira guztira. Turismora bideratutako Next Generation funtsak Espainiako Gobernuaren Berreskuratze, Eraldaketa eta Erresilientzia Planaren barruko Turismo-sektorearen modernizazio- eta lehiakortasun-planean aurreikusitako inbertsiorik garrantzitsuenaren parte dira. Izan ere, planak 3.400 milioi euro bideratuko ditu turismoaren sektorera.