Gorria, zuria eta beltza dira kolore nagusiak aurtengo sanferminetako kartel lehiaketako finalisten lanetan. Hala ere, estilo desberdinak erabiltzen dituzte, eta orain herritarrei dagokie gogokoen dutena aukeratzea.

Zazpigarren urtez jarraian, Iruñean erroldatuta daudenek izango dute botoa emateko eskubidea. Horretarako hainbat bide dituzte: Udalaren webgunean botoa emanda, 010 telefonora deituta, edota hiriburuko Civivox-etan (Sanduzelai, Kondestable, Iturrama, Zabalgune, Mendillorri, Milagrosa eta Jus la Rochako).

Orotara, 546 lan aurkeztu dira aurtengo ediziorako. Iaz, ia ehun gutxiago izan ziren, 451, hain zuzen. Orain, epaimahaiak zortzi hautatu ditu.