Zubietako joaldunak Iturenera joan dira gaur goizean, ohitura den bezala. Zubietarrek, mozorro eta karrozek lagunduta, bisita egin diete aurtiztarrei eta hango joaldunekin elkartu ondoren, herriari bira eman eta salda beroa hartu ondotik Iturenera abiatu dira.

Latsagako Zarandia parean, Iturengo joaldunekin elkartu dira eta herrian barna itzulia egin dute, zintzarrien hotsa lau haizetara zabalduz. Joaldunek aperitiboa hartzen zuten bitartean, Iturengo plazan karroza bakoitzak eta mozorroek beren ikuskizuna egin dute, joaldunek uxatu baino lehen eta urtero bezala ikusle andanaren aurrean.

Bihar, Iturengoek bisita itzuliko diete zubietarrei.