Erabakiaren aroa iragarri zuen Gure Esku Dagok iazko ekainaren 21ean bost euskal hiriburutan egindako ekimenetan eta pixkanaka herriz herri ari da gauzatzen aro hori. Gaur Hernaniko herritar talde zabal batek iragarri du bertan ere galdeketa egiteko prozedura abian jarriko dutela. 

Kultur Etxean herriko ordezkaritza zabal eta anitza elkartu da goizean eta bertan iragarri dute galdeketaren bideari ekingo diotela. Hori bai, bideari berari eman diote garrantzi gehien eta herritarren parte hartzearen bidez nahi dute erabaki galdeketaren data eta bertan pausatu beharko litzatekeen galdera. Horretarako plataforma berezi bat sortuko dute eta hernaniarrei bertan parte hartzeko deia egin diete gaur, apirilaren 9an izango da lehen bilera.

Norabide berean lehen urratsa ekainean bertan emango dute hainbat herri eta eskualdek. Goierrin eta Debagoienan eskualde guztiko herriak elkarrekin ari dira galdeketa egiteko prozesuan aurrera egiten, azken honen kasuan Aramaion ere izango da galdeketa.

Debagoienaren kasuan sinadura bilketari ekin diote galdeketa egin ahal izateko herritarren babesa jasotzeko. Gaur Oñatin ekitaldi jendetsua izan da.

#Oñatin hasi gara sinadura bilketarekin!!!#erabakitzeragoaz#e12@ErainDebagoiena pic.twitter.com/X2RtMCiAXt

— Gure Esku Dago Oñati (@OnatikoGED) 2016(e)ko martxoak 12

Ekainean bertan egingo dute galdeketa Azpeitian, Bakaikun, Diman eta Ispasterren ere.

‘Argitu erabakia’, kriseiluak airera

Hernanin bertan erabakitzeko eskubidearen alde beste ekimen bat izango da gaur iluntzean. 20.00etarako jarri dute hitzordua Zinkoenean eta 2014ko urte amaieran egin zuten moduan, zerua erabakiaren aldeko kriseiluz bete nahi dute. Ez da herri bakarra izango, gaur egitekoak dira, besteak beste, Aulestin, Seguran eta Txingudiko badian. Azken honen kasuan Hendaia, Irun eta Hondarribikoek elkarrekin egingo dute ekimena.

Atzo ere hainbat herritan egin zuten, Markinan eta Galdakaon, besteak beste. 

Argitu erabakia Markina-xemein.#NireEskuDago @GureEskuDago pic.twitter.com/Q4oMoNcjbM

— O (@txiller8) 2016(e)ko martxoak 11