Vueltako bederatzigarren etapa lehiatu dute igande honetan txirrindulariek, 164km-ren ondoren Naranco gainean amaitu dena. Bertan, David de la Cruz izan da bizkorrena, ia etapa osoa ihesean egin ostean.

Hamabi laguneko ihesaldia izan da etapako protagonista, eta tartean izan da Pello Bilbao Caja Ruraleko txirrindularia ere. Azkenean, baina, De la Cruzek indartsuena dela erakutsi du, etapaz gain sailkapen nagusiko lidertza ere eskuratuz.

Hautagai nagusien tropelean ez da mugimendu garrantzitsurik eman eta guztiek batera gurutzatu dute helmugako marra.

Gaurko albiste txarra Igor Antonen erretiroa izan da, tripetako gaitzari aurre egin ezinik lasterketa utzi behar izan baitu.

Itzuliaren inguruko xehetasun guztiak, NAIZen webgune berezian.