Alda mugimenduko 37 militantek Urruñako Euskal Elkargoaren egoitza eta Poplidays etxebizitza turistikoak alokatzen dituen enpresaren artean dagoen bidea kanpin dendekin moztu dute astearte eguerdi honetan. Alokairu turistikoen kopurua abiadura handian igotzen ari da, urte osorakoak txikituz. Garapen hori gelditzeko erakunde publikoari konpentsazio politika abiatu dezan eskatu diote ekintza honen bitartez.

Alokairu turistikoen igoerak urte osorako alokairuen murrizketa ekartzen du, eta horren ondorioz Ipar Euskal Herriko biztanleei bertan bizitzeko aukera zailtzen diela eman dute jakitera. Horrek ekarri duen prezio igoeraz gain, alokatzeko etxe bat aurkitzeko dagoen zailtasuna ere nabarmendu dute. Kanpin dendekin egindako ekintzak, egoerak horrela jarraitzen badu, bertako biztanleak etxeetan baino horrelako dendetan bizi beharko direla eman nahi izan dute aditzera.

«Euskal Elkargoa: Urteko alokatzeak zaindu!» eta «Konpentsazioa orain!» idatzia zen banderolarekin ezarri dira militanteak erakunde publikoaren aitzinean, haien aldarrikapenak argiki adieraziz. Aurrean kanpin dendek bidea zeharkatzen zuten bitartean.

Egoeraren azterketa egin du mugimenduak eta datuak aurkeztu dituzte ekintzan hitza hartu duten Ainize Butronek eta Xebax Christy Aldako lehendakariak. «2017an, Ipar Euskal Herrian 41.670 bizitegi alokatuak ziren biztanleei. Baina Aldaren kalkuluek erakusten dute badirela bederen 6.000 edo 7.000 bizitegi etengabeko etxebizitza turistiko moduan alokatuak direnak, Airbnb, Abritel, Le Bon Coin edo Poplidays bezalako plataformetan. Garapen jarraikian segitzen duen zenbaki hau izugarria da!» adierazi du Butronek.

Zentzu horretan adierazi dute: «Xedea egungo urte osoko alokairuak babestea besterik ez da, eta horrekin, Iparraldeko 40.000 familiei herrian bizitzeko aukera ematea!».

Kanping-dendekin bidea moztu dute @Alda_EH kolektiboko kideek Euskal Elkargoaren atzinean, urte osoan zehar alokatzeko etxerik ez dela esan, eta turistentzat geroz eta etxe gehiago daudela salatzeko. Erakundeari hori gelditzeko politika garatzeko eskatzen diote @naiz_info pic.twitter.com/K7Lwcbf3eb

— Idoia Eraso (@idoia_eraso) July 7, 2021

Aldi berean, Airbnb plataformaren datuak eman dituzte ezagutzera. Euskal Elkargoak 2018an egindako azterketak erakutsi zuen 8.000 eskaintza zeudela plataforman, non mota guztietako alokairuak agertzen diren, uda garairako soilik, gela bat bakarrik... Aldak 2021 honetan egindako zenbaketak kopuru hori 13.000ra igo dela erakusten du. Kopuru horrek egoeraren larritasuna aditzera ematen duela nabarmendu dute.

Bilkura Urruñako auzapezarekin

Euskal Elkargoaren aitzinean mobilizazioa bukatu ondoren, Philippe Aramendik Aldako sei kiderekin bilkura egin du. Urruñako auzapeza eta Euskal Elkargoko kontseilu exekutiboko kidea, lur antolaketaren, ingeniaritzaren eta lurren zuzenbideko gaietan delegatua denari mugimenduaren bi aldarrikapenak aurkeztu dizkiote.

Aramendik auzapez gisara gaia «biziki hurbiletik» bizi duela baieztatu die, eta Herriko Etxeak etxebizitza hutsen eta beti alokairu turistikoa eskaintzen dutenen zenbaketa egitea gogoetatzen ari direla ere bai.

Elkargoko hautetsi bezala, gaiaz arduratzen diren presidenteordeekin harremanetan jarriko dela, eta bi eskaerak kontuan hartuak izan daitezen lan egingo duela adierazi du, bere ustetan egingarriak baitira. «Iraganak erakusten du, ainitzetan gizarte zibilaren interpelazioaren ondorioz dituztela hautetsiek hartu behar diren erabakiak hartzen», nabarmendu du hautetsiak.

Politika publikorako neurriak

Egungo etengabeko alokairu turistikoen igoera gelditzeko, Euskal Elkargoari konpentsazio politika eskatzearekin batera, hori abian jartzeko beharko liratekeen neurriak azaltzen dituen txosten juridikoa prestatu dute Aldako kideek. Politika hori hurrengo hilabeteetan ezartzeko aukera legokeela ere jakinarazi dute.

Bertan agertzen diren neurriak «eraginkorrak eta legalak badira, eta indarrean dira Bordele, Estrasburgo, Nantes, Lyon edo Paris bezalako hirietan». Eta bertan eraginkorrak direla gaineratu dute.

Konpentsazioaren neurria eman dute adibidetzat, non etxebizitza turistiko bakoitzaren truke urte osoan alokatua den etxebizitza bat merkatuan jartzera behartzen duen.

Proposatzen duten politika berri honek Elkargoak 2019an onartu zuena aldatzea suposatuko luke. «Epe laburreko alokatzeko etxebizitza hornituen sortzeko bizitegien erabilera aldaketa emateko irizpideen araudia aldatzea» eskatu du Christyk.

Hitzorduak hautetsiekin

Euskal Elkargoko Turismo, natura eta ondarearen presidenteordea den Daniel Olzomendirekin duela gutxi izandako bilkuran txostena helarazi zioten. Eta Roland Hirigoyen Etxebizitzarako presidenteordeari hitzordua eskatu diote.

Alda mugimendua Ipar Euskal Herriko auzo eta eremu herrikoien defentsan lanean aritzeko sortu da, eta lehen aldiz egin du etxebizitzaren arazoari loturiko ekintza bat, baina egoeraren garapena geldiarazteko, heldu den hilabeteetan ekintza gehiago izanen direla ere aitzinatu dute. «Neurriak hartuak izan arte, segituko dugu, lekuko biztanle pobreenak babesteko».

«Herrian bizi, ez espekulatu» kanpainaren baitan sinadura bilketa abiatu du mugimenduak bere webgunean.