Imanol Carrillo
Kirol-erredaktorea / Redactor deportivo

Hondarribiak garaipena eta Eusko Label Ligako lidertza eskuratu ditu Sestaoko uretan

«Ama Guadalupekoa» ontzia 580 metroren faltan lider jarri da. Azken luze horretan lehenengo kalera joan den bitartean, Urdaibai laugarrenera abiatu da eta azken unera arte ez da garailea erabaki. Donostiarra hirugarren izan da eta puntutan berdinduta daude lidertzan.

Hondarribiako arraunlariak, leher eginda, Sestaon irabazi berritan.
Hondarribiako arraunlariak, leher eginda, Sestaon irabazi berritan. (Oskar MATXIN | FOKU)

Eusko Label Ligak lider berria du larunbat honetan Sestaon jokatutako estropada ostean. Hondarribiak sailkapen nagusiko lehen postua kendu dio Donostiarrari, gaur hirugarren, nahiz eta puntu berdinak (76) eta garaipen berberak (2) izan bi ontziek. Igande honetan Santurtzin egingo den probak gauzak gehiago argitu litzake.

Ohorezko txanda: Urdaibai, ondo; Hondarribia, bikain

Hirugarren kalea ondo etorri zaio Urdaibairi lehen luzean. Biraketan azkarrena izan da, aurreko txandan Kaikuk egindako denbora onena segundo bakar batengatik hobetuz. Atzetik Hondarribia, bi segundora, Donostiarra liderra, hiru segundora, eta Orio, sei segundora, iritsi dira maniobrara.

Baina bigarren luzean "Ama Guadalupekoa" ontziak, bigarren kaletik, aurre hartu die Bermeokoei zenbait momentutan, eta bien arteko lehia argi ikusi da. Donostiarra ez zetorren oso urruti, 4 segundora, baina ezin izan ditu olatu eta palada onak hartu hor aurrean ipintzeko.

Bigarren biraketan Hondarribia izan da azkarrena eta bera eta Donostiarra artean Urdaibai jarraitzea ondo etortzen zitzaien berdeei, sailkapen nagusian lider jartzeko aukera bikaina baitzen.

Baina hirugarren luzean asko gerturatu dira elkarren artean bigarren eta hirugarren kaleetatik. Urdaibaik bazekien estropada apurtu behar zuela momentu honetan, gero azken luzean arazoak ez izateko, baina "Ama Guadalupekoa" traineruak ondo eutsi dio. Azken biraketan bi segundo gehiago behar izan dituzte gipuzkoarrek, baina 580 metroren faltan lider jarri da Hondarribia eta lehenengo kalera joan den bitartean, Urdaibai laugarrenenera abiatu da.

Emozioa azken unera arte mantendu da, baina garaipena eta lidertza Hondarribiarentzat izan da, Donostiarra hirugarren izan baita. Nahiz eta puntutan eta garaipenetan berdinduta egon, "Ama Guadalupekoa" lehenengo postuan jarriko da azken garaipena berea izan delako.

2. txanda: Zierbena, 2 ehunenengatik Kaikuri irabazita

Hasi eta berehala Zierbena eta Getaria asko gerturatu dira elkarren artean lehenengo eta bigarren kaleetan. Uretako epailea adi-adi egon behar izan du momentu horretan, baina ez da ezer gertatu. Eta ez da gertatu den aldi bakarra izan!

Lehenengo luze horretan bi ontzi horiek eta Kaiku aritu dira lidergoan eta Lekittarra segituan geratu da atzean. Hala, lehenengo ziabogan Kaiku izan da azkarrena, Zierbenari 3 segundo ateraz eta Getariari 4.

Bigarrenean Zierbena nagusitu da, Kaiku eta Getariari segundo bat ateraz, baina hurrengo luzean Zierbena eta Getaria pega-pega eginda aritu dira, epailea oso gertu zela, eta egoera hau aprobetxatu du Kaikuk lehen postua berreskuratzeko. Lau segundoko aldea atera die aurkariei hirugarren biraketan, azken luzean abantaila on batekin aritu ahal izateko.

Baina Jose Luis Kortarenek ezin izan dute abantaila mantendu. Erruduna? Zierbena bikain bat izan da, azken unean irabazi baitio bi ehuneneko (0.02) abantaila txiki batekin. Hala, Borja Gomez patroiak gidatutako ontzia txandako garailea izan da, ordurako egindako denboren artean onena eginda. Atzetik Kaiku, Getaria (+2) eta Lekittarra (+27) helmugaratu dira.

1. txanda: Cabo nagusi

Aurreko larunbateko gertakaria –abordaia egin zuten Aresekin eta punturik gabe geratu ziren– alde batera utzi eta goraka joan nahi duela erakutsi du Cabok lehenengo txandan. Lehenengo ziabogatik nabarmendu da talde galiziarra eta atzeko ontziek postuak alderatu dituzte estropada aurrera joan ahala.

Hala, Ares bigarren izan da lehenengo biraketan, baina bigarrenean laugarren postura jaitsi da, Santurtzik bigarrena eta Ondarroak hirugarrena eskuratu baitute. Hirugarrenean, aldiz, Ondarroa jaitsi da azken postura eta azken luzean hirugarrena eskuratu du.

Ondarrutarrek ondo aprobetxatu zuten sailkapen nagusian aurreko asteburuan Cabok eta Aresek jasotako zigorra, baina gaurkoan ezin izan du beheko postu horiek urruntzeko helburua biribildu. Egia da azkenean Aresen aurretik sailkatu direla, baina Cabok hiru puntu gehiago eskuratu ditu.

Azken luzean Santurtzi Caboren atzean ipini da, galiziarrek uzten zuten ura garbiagoa zelako eta hobeto aprobetxatzeko, baina galiziarrek ez dute lehen postu hori galdu.

SESTAOKO UDALAREN XXI. BANDERA
    1.    Hondarribia           19:28.48        
    2.    Urdaibai                19:29.18
    3.    Donostiarra           19:45.78
    4.    Orio                      19:56.88
    5.    Zierbena               19:58.72        
    6.    Kaiku                    19:58.74
    7.    Cabo                    19:59:58
    8.    Getaria                 20:00.74
    9.    Santurtzi               20:06.88
    10.    Ondarroa            20:10.48        
    11.    Ares                   20:15.42
    12.    Lekittarra            20:26.18

EUSKO LABEL - SAILKAPEN NAGUSIA
    1.    Hondarribia           76 puntu        
    2.    Donostiarra           76
    3.    Urdaibai                72
    4.    Orio                      69
    5.    Getaria                 46
    6.    Kaiku                    45
    7.    Zierbena               45
    8.    Lekittarra              28
    9.    Santurtzi               27
    10.    Ondarroa             22
    11.    Cabo                   19
    12.    Ares                   18